काठमाडौं । नेपाल प्रिमियर लिग (एनपीएल) सुरु हुने मिति निकै नजिक आउँदा अहिले यसको चहलपहल धेरै बढेको छ ।

पर्सी (मंसिर १५ ) गतेदेखि कीर्तिपुरस्थित टीयू अन्तर्राष्ट्रिय मैदानमा ८ टिमको सहभागितामा एनपीएल सुरु हुनेछ । त्यसका लागि अहिले आयोजक नेपाल क्रिकेट संघ (क्यान) देखि सहभागि फ्रेन्चाइज टोलीहरु तिव्र तयारीमा छन् ।

खेलाडीहरु मैदानमा प्रशिक्षक गर्ने, अभ्यास खेल खेल्ने देखि पुरस्कार र प्रायोजकको घोषणा हुने क्रम जारी छ । यस्तै विदेशी खेलाडीहरु पनि नेपाल आउने क्रम जारी छ ।

टिकट सोल्डआउट

एनपीएलको चर्चा अहिले यति धेरै छ कि मंसिर १५ गते हुने विराटनर किंग्स र जनकपुर बोल्ट्सबीचको उद्घाटन खेलको टिकट सोल्ड आउट नै भएको छ । आयोजक क्यान र टिकेटिङ पार्टनर खल्ती दुवैले पहिलो खेलको टिकट सोल्ट आउट भएको जानकारी दिएको छ ।

उद्घाटन खेलको टिकट तीन दिनअघि नै सोल्ट आउट भएको हो । टीयू मैदानको कूल क्षमता १२ हजार जति भएपनि उद्घाटन खेलका लागि भिआईपी टिकट र नर्मल गरी १० हजार मात्र विक्री गरिएको क्यान प्रवक्ता छुम्मी लामाले जनाए ।

टियू मैदानमा मुख्य प्रायोजक सिद्धार्थ बैंकका लागि सिद्धार्थ बैंक जोन पनि छुट्याईएको लामाले जानकारी दिए ।
मंसिर १० गते बेलुका ८ बजेबाट क्यानले टिकट बिक्री खुला गरेकोमा तीन दिनमै टिकट सोल्ड आउट भएको हो । दर्शकले जोन अनुसार नै टिकट काट्नुपर्नेछ र त्यही जोनमा प्रवेश गर्ने र बाहिरिने गर्नुपर्नेछ ।

एनपीएल खेल्न विदेशी खेलाडी नेपाल आइपुग्ने क्रम जारी छ । बुधबार एकै दिन धेरै विदेशी खेलाडी (११)
नेपाल आइपुगे । पोखराको सर्वाधिक ४ विदेशी खेलाडी काठमाडौ आइपुगे ।

अब बिहीबार र शुक्रबार पनि विदेशी खेलाडी आउने क्रम जारी हुनेछ । विदेशमा लिग खेलिरहेका केही खेलाडी भने एनपीएल सुरु भएपछि आउने तयारीमा छन् ।

एनपीएलमा ८ फ्रेन्चाइज टिमले प्रतिस्पर्धा गर्नेछन् र सबै ८ वटै टिम काठमाडौंमा जम्मा भइसकेका छन् ।