बाणगंगा । १५औँ कपिलवस्तु महोत्सवको मुख्य आकर्षणका रुपमा रहेको १३औं कपिलवस्तु डान्स आईडलको मेगा अडिसन भोलि शुक्रबार हुने भएको छ ।

डान्स आईडल संयोजक विष्णु मल्लले अडिसनको पहिलो र दोस्रो चरणमा छनोट भएका सहभागीहरु शुक्रबार हुने मेगा अडिसन सहभागी हुने बताईन् । शुक्रबार विहान ११ बजेदेखि कपिलवस्तु उद्योग बाणिज्य संघको सभाहल चारनम्बरमा मेगा अडिसन हुने उनले बताईन् ।

डान्स आईडलका मुख्य निर्णायक हरिशरण रिजालले १५ जना सहभागीलाई छनोट गरी प्रतिस्पर्धीको रुपमा स्टेजमा उतार्ने योजना रहेको बताए । उनले अडिसनमा निकै प्रतिभावान र राम्रो सभ्भावना बोकेका बालबालिकाको सहभागिता रहेको भन्दै खुशी व्यक्त गरे ।

उनले कपिलवस्तु डान्स आईडल लुम्बिनी प्रदेशकै एक प्रतिष्ठित आईडल भएको बताउँदै यस आईडलका प्रतिस्पर्धी देशकै गहना बन्ने बताए । उनले यस पटकको आईडललाई विगतको भन्दा पृथक बनाउन नविन अभ्यासहरुको थालनी गर्ने योजना रहेको बताए ।

१३ औं कपिलवस्तु डान्स आईडलको विजेताले नगद १ लाख ११ हजार १११ रुपैयाँसहित चाँदीको ट्रफी प्राप्त गर्ने छ भने उपविजेताले ७७ हजार ७७७, तृतीयले ५५ हजार ५५५ र सान्तवना हुनेले २५ हजार ५२५ रुपैयाँसहित ट्रफी र विभिन्न गिप्ट ह्याम्परहरु प्राप्त गर्ने छन् ।

१५ औँ कपिलवस्तु महोत्सव कृषि पर्यटन तथा औद्योगिक प्रदर्शनी कपिलवस्तु उद्योग बाणिज्य संघको आयोजनामा यही मंसिर १९ गतेदेखि पुष २ गतेसम्म बाणगंगा नगरपालिकाको बुद्धरंगशालामा हुदैंछ ।