बुटवल । लुम्बिनी प्रदेशका ५ स्थानीय तहको आइतबार सम्पन्न उपनिर्वाचनको मतगणना सुरु भएको छ । रुकुम पूर्वको पुथा उत्तरगंगा गाउँपालिका उपाध्यक्षबाहेक वडाध्यक्षहरूको मतगणना आइतबार रातिबाटै सुरु भएको हो ।

लुम्बिनीमा रुकुम पूर्वको पुथा उत्तरगंगा गाउँपालिकामा उपाध्यक्ष र वडाध्यक्ष, गुल्मीको मुसिकोट नगरपालिका, बर्दियाको ठाकुरबाबा गाउँपालिका, रोल्पाको रुन्टीगढी गाउँपालिका र कपिलवस्तुको शुद्धोधन गाउँपालिकामा वडाध्यक्षका लागि निर्वाचन भएको हो । सम्बन्धित स्थानीय तहका मतदान अधिकृतहरूका अनुसार सबै स्थानीय तहमा निर्वाचन शान्तिपूर्ण रुपमा सकिएको छ ।

रुकुम पूर्वको पुथा उत्तरगंगा गाउँपालिकाको उपाध्यक्षको बाहेक अन्य सबै वडामा आइतबार रातीदेखि नै मतगणना सुरु गरिएको छ । पुथामा सोमबार बेलुका सर्वदलीय बैठक बसेर वडाध्यक्षको मतगणना सुरु गरिएको हो । पुथामा उपाध्यक्षका लागि १४ वडाका मतपेटिका गणनास्थलसम्म ल्याउन समय लाग्ने भएकाले सोमबार बिहानबाट मात्र मतगणना गर्ने गरी तयारी गरिएको निर्वाचन सहायक अधिकृत ईश्वरीप्रसाद सुवेदीले बताए । पुथामा ११ हजार १ सय ८० मतदातामध्ये ५ हजार ९ सय ३३ जना मात्रै मतदानमा सहभागी भएको सुवेदीले बताए ।

कपिलवस्तुको शुद्धोधन–१ मा ६९ दशमलव ४१ प्रतिशत मत खसेको छ । जिल्ला निर्वाचन अधिकारी अमरबहादुर वलीका अनुसार ३ हजार ३ सय ७९ मत खसेको छ । उनले तीनवटै मतदान स्थलमा गरी ६९।४१ प्रतिशत मत खसेको बताए । वलीले आइतबार राती ८ बजेदेखि नै मतगणना सुरु भएको बताए । रुकुम पूर्वको पुथा उत्तरगंगाको वडा नं। २ को वडाध्यक्षमा भने यसअघि नै माओवादीका उम्मेदवार जगत घर्ती निर्विरोध निर्वाचित भइसकेका छन् ।

शुद्धोधन गाउँपालिका–१ मा निर्वाचनका लागि ४ हजार ८ सय ६८ मतदाता रहेका थिए । नेपाली कांग्रेसबाट निर्वाचित वडाध्यक्ष तिलकराम यादवको २०८१ असोज ८ गते निधन भएपछि रिक्त पदका लागि निर्वाचन भएको थियो । वडाध्यक्ष पदमा चार स्वतन्त्रसहित १४ जना उम्मेदवार प्रतिस्पर्धामा छन् । यहाँको पनि मतगणना सुरु भएको छ ।

त्यस्तै बर्दियाको ठाकुरबाबा नगरपालिका–४ को वडाध्यक्षका लागि भएको निर्वाचनमा ६३ दशमलव ७९ प्रतिशत मत खसेको छ । बर्दियामा पनि आइतबार रातीबाटै मतगणना सुरु भएको छ । ठाकुरबाबा नगरपालिका–४ मा ३ हजार ५ सय १० मतदातामध्ये २ हजार २ सय ३९ जनाले मतदान गरेको मुख्य निर्वाचन अधिकृत मनोज श्रेष्ठले बताए । त्यहाँ वडाध्यक्ष पदका लागि ६ जना उम्मेदवार छन् । वडाध्यक्ष सूर्यबहादुर विष्ट जिल्ला समन्वय समितिका प्रमुख भएपछि हाल उपनिर्वाचन भएको हो ।

त्यस्तै गुल्मीको मुसिकोट नगरपालिका–१ को वडाध्यक्षका लागि भएको निर्वाचनमा ५७ दशमलव १ प्रतिशत मत खसेको छ । वडाका ४ हजार ५१ मतदातामध्ये २ हजार ३ सय ३४ जनाले मतदान गरेको प्रमुख जिल्ला अधिकारी जनार्दन गौतमले बताए । गौतमका अनुसार मुसिकोट नगरपालिकामा पनि आइबार रातीदेखि नै मतगणना सुरु भएको छ ।

रोल्पाको रुन्टीगढी गाउँपालिका–४ को वडाध्यक्षका लागि भएको निर्वाचनमा झण्डै ६० प्रतिशत मत खसेको छ । १ हजार ९ सय मतदाता रहेको वडामा १ हजार २ सय ९७ जनाले मतदान गरेका छन् । रुन्टीगढीको मतगणना सुरु भइसकेको छ । तीन घण्टाभित्र नै नतिजा सार्वजनिक गर्ने गरी मतगणना भइरहेको प्रमुख जिल्ला अधिकारी खिमबहादुर अधिकारीले बताए ।