जितपुर । लायन्स क्लव अफ कपिलवस्तुले प्रहरीलाई रिफ्लेक्टिभ ज्याकेट वितरण गरेको छ । इलाका प्रहरी कार्यालय पिपराका प्रहरीलाई रातको समयमा हुने र अन्य जोखिमपूर्ण काममा सहयोग पुगोस् भन्ने ध्येयले रिफ्लेक्टिभ ज्याकेट सहयोग गरिएको हो ।

क्लवका अध्यक्ष नवदत्त घिमिरे, कोषाध्यक्ष विष्णु घिमिरे, लायनद्धय रामु भुसाल, विष्णु गैरे लगायत प्रहरी कार्यालयमा पुगेर कार्यालय प्रमुख प्रहरी नीरिक्षक लोकेन्द्र बहादुर जिसीलाई ज्याकेटहरु हस्तान्तरण गरेका थिए ।

ज्याकेट लिँदै प्रहरी नीरिक्षक जिसीले लायन्स क्लवले प्रहरीको लागि निकै ठुलो सहयोग गरेको बताए । रिफ्लेक्टिभ ज्याकेट नभएर रातको समयमा काम गर्न कठिन रहेको उनले बताएका थिए ।

कोषाध्यक्ष घिमिरेले प्रहरीले यो साधन नभएको बताएपछि आफूले सहयोग गर्ने धारणा निर्माण गरेर क्लवसंग सल्लाह गरी सहयोग गरिएको बताए ।