काठमाडौँ । राष्ट्रिय स्वतन्त्र पार्टीका सभापति रवि लामिछाने शनिबार कपिलवस्तुको खुला सभालाई सम्बोधन गर्ने भएका छन् । बाणगंगा नगरपालिकास्थित बुद्ध रंगशालामा विहान ११ बजे सभापति लामिछानेले सभाको सम्बोधन गर्ने बताइएको छ । रविले आफूमाथिका बिभिन्न आरोप, कपिलवस्तुको विकास लगायतमा आफ्नो धारणा राख्ने छन् ।

पार्टीको जिल्ला कमिटिले आयोजना गरेको कार्यक्रमको लागि स्टेज, साउण्ड सिस्टम लायतको राम्रो प्रबन्ध गरिएको जिल्ला सभापति शिव सुवेदीले बताए । रविको साथमा पार्टी उपसभापति डिपी अर्याल, केन्द्रि सदस्य अर्जुन अधिकारी लगायतका नेता सहभागि हुनेछन् ।

उनका अनुसार कार्यक्रममा सुरक्षा प्रदान गर्न सुरक्षाकर्मीसहित दर्जनौँ स्वयमसेवक परिचालन हुने छन् । सुवेदीले भोलिको कार्यक्रममा जिल्लाका बिभिन्न ठाउँबाट हजारौँको सहभागिता हुने विश्वास ब्यक्त गरे ।

हप्तादिनअघिबाट माइकिङ गरी प्रचार गरिएको र धेरै जना रवि लामिछानेको भाषण सुन्न आतुर रहेको बाणगंगा नगरसभापति बुद्धि सागर बेलबासेले अपिटाइम्सलाई बताए । जिल्लाका नेता तथा लुम्बिनी प्रदेशका प्रवक्ता कमल पोख्रेलले अरु दलका नेता कार्यकर्ता पनि रविको भाषण सुन्न जाने बताइरहेकाले हजारौँ जनता उत्रने दावी गरे ।

कार्यक्रममा लुम्बिनी प्रदेशका बिभिन्न जिल्लाबाट नेता कार्यकर्ता आउने पार्टीले जनाएको छ ।