काठमाडौँ । नेकपा एमालेबाट सरकारमा सहभागी हुने ८ जनाको मन्त्रालय टुंगिएको छ । सरकारमा एमालेको नेतृत्व गर्ने सचिव रघुवीर महासेठ उपप्रधानमन्त्री तथा भौतिक पूर्वाधार मन्त्री हुनेछन् ।

त्यस्तै पदम गिरी कानुन, न्याय तथा संसदीय मामिला, हरि उप्रेती रक्षा, भगवती चौधरी महिला, बालबालिका तथा ज्येष्ठ नागरिक मन्त्रालय र राजेन्द्र राईले खानेपानी मन्त्रालय सम्हाल्नेछन् ।
दामोदर भण्डारीले उद्योग, वाणिज्य तथा आपूर्ति, ज्वालाकुमारी साहले कृषि तथा पशुपक्षी मन्त्रालय सम्हाल्दा कपिलवस्तुका बलराम अधिकारी पनि मन्त्री बनेका छन् । उनल भूमि व्यवस्था, सहकारी तथा गरिबी निवारण मन्त्रालय सम्हाल्ने एमाले स्रोतले जनाएको छ ।

कपिलवस्तुको क्षेत्र १ बाट प्रतिनिधि सभा सदस्य निर्वाचनमा माओवादी केन्द्रका उम्मेदवार चक्रपाणि खनाललाई दोब्बर मतान्तर (१८ हजार ४२९ ) ले हराएका सांसद अधिकारीलाई गत वर्ष पनि प्रचण्ड नेतृत्वको सरकारमा मन्त्री बनाउने निधो गरेर पार्टीले सपथको लागि तयार रहन भनेको थियो । सोही अनुसार अधिकारीले पनि दौरा सुरुवाल तयार पारेर रातारात काठमाण्डौँ पुगेका थिए ।

तर अन्तिममा नाम काटिएर आएपछि अधिकारीको मन कुँडिएको थियो । पहिलो प्रयासमा मन्त्रीमा असफल भए पनि दोश्रोपटकमा भने अधिकारी मन्त्री बनेरै छोडे । पार्टीमा लामो समय रहेर योगदान गरेकोमा यसपटक पार्टीले न्याय गरेको भन्दै अधिकारीले अपिटाइम्समार्फत् नेतृत्वलाई धन्यबाद दिए ।

अहिले सपथ समारोहमा रहेको हुनाले धेरै बोल्न नमिलेको बताउँदै मन्त्री अधिकारीले आफूले राम्रो र स्मरणीय काम गर्ने दावी गरेका छन् ।