चन्द्रकान्त न्यौपाने
कपिलवस्तु । बाणगंगा नगरपालिकाले आयोजना गरेको पाँचौँ मेयर कपमा फितलो ब्यवस्थापन देखिएको छ । कहाँसम्म भने खेलाडी गम्भीर घाइते हुँदासमेत उनलाई अस्पताल लैजाने एम्बुलेन्स नभएको कहालिलाग्दो स्थिति देखियो ।

के भएको थियो ?
आइतबार सेमिफाइनलको लागि वडा नम्बर २ र १० बीच खेल भएको थियो । त्यस खेलमा वडा नम्बर २ का गोविन्द पालुङे घाइते भए । हेडिङको क्रममा विपक्षी खेलाडीसंग ठोक्किँदा उनलाई निधारको हड्डीमा गम्भिर चोट लाग्यो । त्यसपछि धेरै रक्तश्राव भयो । गाविन्द निकै आत्तिएका थिए भने उनको टिम र दर्शक नै भावुक देखिन्थे ।

उनलाई तत्काल एम्बुलेन्समार्फत् अस्पताल लैजानु पर्ने अवस्था थियो । तर घटनास्थलमा एम्बुलेन्स थिएन । एउटा नीजि कारमार्फत् गोविन्दलाई अस्पताल लगिएको थियो । प्राथमिक उपचारपछि गोविन्दको बुटवलको एक अस्पतलमा अहिले उपचार भइरहेको छ । उनी अहिले खतरामुक्त रहेको समाचार श्रोत छ ।
यो घटनापछि मेयर कपको ब्यवस्थापनमाथि प्रश्न चिन्ह खडा भएको छ । खेल हेर्न रंगशाला पुगेका दर्शकले गोविन्दलाई बोक्न एम्बुलेन्स नहुनु दुखद भएको बताउँछन् ।

किन भएन एम्बुलेन्स ?
‘मेयर कपमा एम्बुलेन्सको ब्यवस्थापन नगरिएको भन्ने होइन’, नगर खेलकुद विकास समितिका अध्यक्ष पदम सेन भन्छन् ‘संयोगले आइतबार संयोग त्यस्तै भयो । गोविन्द एक्कासी घाइते भए । त्यहि समयमा त्यहाँ एम्बुलेन्स भएन । रगत धेरै बग्न थालेपछि नीजि कारमार्फत् अस्पताल लगेका हौँ ।’ सेनले एम्बुलेन्स पछि आएको बताए ।

समितिका एक सदस्यले घाइते खेलाडीलाई एम्बुलेन्सले लैजानुपर्नेमा कारमार्फत् अस्पताल लैजाँदा स्वभाविक रुपमा यस्तो प्रश्न आउने बताए । तर एम्बुलेन्स नै ब्यवस्थापन नगरेको भन्न अर्थमा बुझ्न नहुने उनको भनाई छ । उनले थपे, ‘अघिपछि सधैँ एम्बुलेन्स थियो । आइतबार त्यो घटना हुँदा भएन । खेलाडीलाई चोटपटक जतिखेर पनि लाग्न सक्छ भनेर स्याण्डबाई एम्बुलेन्स राख्न नसक्नु हाम्रो कमजोरी हो ।’ समितिका अध्यक्ष सेनका अनुसार मेयर कपको लागि नगरले १२ लाख रुपैयाँ बजेट विनियोजन गरेको छ ।

बजेट हुँदाहुँदै पनि यस्तो कमजोरी हुनुलाई धेरैले राम्रो रुपमा लिएका छैनन् । ‘खेल आफैमा जोखिमपूर्ण हुन्छन् । यसमा घटना दुर्घटना हुने पूर्व आंकलन हुन्छ । दुर्घटना जतिखेर पनि हुन सक्दछ’, एक जना खेलाडी भन्छन् ‘एम्बुलेन्स थियो तर यतिखेर भएन भन्ने जवाफ होइन । एक सेकेण्ड पनि खेल भएको स्थान एम्बुलेन्सविहिन हुनुहुँदैन । आज जे भयो त्यो लापरबाहिका कारण नै भयो । खेललाई जोखिम संवेदनशिलतासंग जोड्न सकिएन । यसबाट नगरले पाठ सिक्नुपर्दछ ।’

समितिका एक सदस्यले यो गत बर्ष भन्दा ३ लाख कम बजेट रहेको बताए । मेयर कपको लागि यति रकम पर्याप्त छैन, पुरस्कारदेखि सबै ब्यवस्थापन यसैबाट गर्नुपर्दछ । बाध्य भएर ब्यवस्थापनका धेरै कुरामा कञ्जुस्याई गर्नु परेको छ, उनले थपे ‘तर प्राथमिक उपचार र एम्बुलेन्सको लागि भने हामीले कुनै कञ्जुस्याई गरेका थिएनौँ । संयोग नै त्यस्तो भयो । गोविन्द भाइ घाइते भए । तत्काल एम्बुलेन्स उपलब्ध हुन सकेन । भाइको शीघ्र स्वास्थ्य लाभको कामना ।’

खेलमा खेलाडी घाइते हुन सक्छन्, गम्भिर चोटग्रस्त हुन सक्छन्, ग्याङफाइट नै हुन सक्छ । समयमा प्राथमिक उपचार हुन सकेन भने ठुलो क्षति निम्त्याएका उदाहरण पनि छन् । यहि पूर्व आंकलनलाई नगरले संवेदनशिल तवरबाट लिन नसक्दा मेयर कपको ब्यवस्थापनमा प्रश्न सिर्जना गरेको खेल हेर्न पुगेका दर्शकहरुले बताए ।