काठमाडौँ। आगामी चैत्र १७ गतेदेखि प्रथम कपिलवस्तु (तिलौराकोट) गोल्डकप–२०८० शुरू हुने भएको छ।

कपिलवस्तु फुटवल संघको आयोजनामा बाणगंगास्थित बुद्ध रंगशालामा प्रतियोगिता हुने भएको हो ।
संघका अध्यक्ष तिलक थापाले खेलमा ए डिभिजनका ४ र मोफसलका ४ गरी ८ टिमले प्रतिस्पर्धा गर्ने बुधबार आयोजित पत्रकार सम्मेलनमार्फत् जानकारी दिए ।

स्वास्थ्यको लागि खेलकुद राष्ट्रको लागि खेलकुद भन्ने मुल नारासहित हुने प्रतियोगितामा ए डिभिजन क्लबहरु थ्री स्टार , त्रिभुवन आर्मी, मछिन्द्र, नेपाल पुलिस र मोफसलका हनामी बीएफसी, सुदूरपश्चिम११, सहारा र आयोजक टिमबाट कपिलवस्तु –११ ले प्रतिस्पर्धा गर्नेछन् । चैत्र २४ गते प्रतियोगिता सकिने छ ।

प्रतियोगितामा प्रथम हुनेलाई ११ लाख ११ हजार १११ र दोस्रो हुनेलाई ५ लाख ५५ हजार ५५५ रुपैयाँ र शिल्ड, मेडल र प्रमाणपत्र दिइने अध्यक्ष थापाले जानकारी दिए।

प्रतियोगिताको उत्कृष्ट खेलाडीले १ लाख रुपैयाँ पाउने छन् भने विधागततर्फ (सर्वाधिक गोलकर्ता र वेष्ट प्लेअर, उत्कृष्ट गोल रक्षक, डिफेन्स, फरवार्ड, प्रशिक्षक) पनि पुरस्कृत हुने थापाले बताए । यस्तै हरेक दिन हुने म्यान अफ दि म्याचलाई नगद १० हजारले सम्मान गर्ने कार्यक्रम रहेको अध्यक्ष थपाले बताए । गोल्डकप व्यवस्थापनका लागि १ करोड १८ लाख बढी खर्च हुने अनुमान गरिएको छ।