चन्द्रकान्त न्यौपाने

कपिलवस्तु । नेकपा एमालेका अध्यक्ष केपी शर्मा ओलीले सहमतिबाट नेतृत्व गर्न सुझाव दिएका छन् । प्रजातन्त्रको प्रचलित सर्वोत्तम विधि सहमति र समझदारी भएकोले अबको नेतृत्व सकेसम्म सहमतिबाट गर्न उनले नेताहरुलाई सुझाएका हुन् । चुनाव पनि प्रजातन्त्रको उत्तम विधि भए पनि त्योभन्दा उत्तम प्रचलित विधि समझदारी र सहमति भएको ओलीको भनाई छ ।

ओलीले भने, ‘हडबडी गर्ने होइन आत्तिने होइन, जहाज छुट्यो भन्ने होइन, फेरि आउँछ । म विहान चडेको जहाज फेरि सक्यो होला । त्यस्तै हो, त्यसो भएर सकेसम्म एकतावद्ध हुनुस्, छाड्दा र त्याग्दा प्रतिष्ठा घट्दैन । अर्कोपटक अवसर आउँछ । मै खाऔँ मैलाऔँ नगरौँ । यो नीति एमालेको होइन अरुको हो ।’ उनले एक ब्यक्ति दुई कार्यकालभन्दा बढी उठ्न नपाउने नियम बनाएकाले सबैले पालो पाउने बताए ।

अहिले अवसर नपाउनेले भोलि संघ, प्रदेश स्थानीय तहको सरकार इत्यादिमा अवसर पाउने बताउँदै के लिएँ भन्दा पनि के दिएँ भनेर सोच्न नेताहरुलाई उनको आग्रह छ ।
पदलाई केन्द्रमा राखेर काम नगर्नुस, आफ्नो कर्तव्यलाई केन्द्रमा राख्नुहोस्, पद नपाउदा पनि मान्छे महान हुने भन्दै उनले महात्मा गान्धीको उदाहरण प्रस्तुत गरे । पद नलिएर पनि महात्मागान्धी असाधारण रहेको उनले बताए । ओलीले सहमति नभए लामो समय लगाउन नहुने भन्दै तुरुन्तै चुनावको बाक्सा थाप्नु पर्ने बताए । मंचका नेतालाई साथीहरु सम्बोधन गर्दै ओलीले जोशिँदै भने, ‘यदि त्यो सहमति भएन भनेसहमतिको नाममा १० दिन नराख्नुस । भोलि बाक्सा थाप्नुहोस् । मिलाउने यो त्यो भनेर समय नराख्नुहोस् । ढिलो नगर्नुस् । प्रतिनिधि आएका छन् । मत खसाल्न आएका छन् । यता बस्ने नेताले हस्तक्षेप गर्ने, कानकानमा कुरा खेलाउने नगर्नुस् । प्रतिनिधिले पनि भन्नुस् सके सहमति गर्नुहोस् नसके कहाँ भोट हाल्ने हामीलाई थाहा छ भन्नुहोस् ।’

उनले माथिबाट कसैमाथि पनि समर्थन नभएको बताए । ठट्यौली पारामा उनले भने, ‘माथिबाट उठ्न चाहेका सबैलाई ‘मंगलम् भगवान विष्णु, मंगलम गरुडध्वजः ….।’ उनले यो भनिरहँदा नेताकार्यकर्ता गलल हाँसेका थिए ।जसले भोट ल्याउँछ उसले जितोस् । कम ल्याउनेले स्विकारोस । हिहिप हुर्रे भनेर ज्यादा फुर्ति नछोडोस् । हार्ने पनि निरास नहोओस् चुनावमा उठ्दै गर्दा जस्तो जोश आएको थियो त्यस्तै जोश फेरि पनि देखाओस् ।’