कपिलवस्तु । बाणगंगा नगरपालिकाको जितपुरमा सन्दिपको न्यायको लागि आज दबाबमूलक प्रदर्शन हुने भएको छ । सन्दिपको पक्षमा देशभर प्रदर्शन भइरहेको अवस्थामा कपिलवस्तुमा पनि उनका समर्थक, खेलाडी र बिभिन्न संघसंस्थाले विहान १० बजे प्रदर्शन गर्ने भएका हुन् । कार्यक्रमको लागि अभियान्ता डाक्टर निकालेस भुसाल पनि आउने छन् ।

बाणगंगा राइडर्स क्लव, बाणगंगा स्टार्क स्पोर्टस् क्लव, मोबाईल एसोसिएसन, क्रिकेट खेलाडी लगायत सहभागि भएर सन्दिपलाई न्याय दिनको लागि दबाब दिने बाणगंगा राइडर्स क्लवका विष्णु गैरेले जानकारी दिए ।

१० बजे चोकमा जम्मा भएर केहिछिन र्याली प्रदर्शन गरेर कोणसभा गर्ने उनीहरुले जनाएका छन् । कार्यक्रम सबैको रहेकाले स्वतस्फुर्त सहभागि हुन उनीहरुको आग्रह छ ।

सन्दिपले आफू अन्यायमा परेको भन्दै फेसबुकबाट सार्वजनिक गरेपछि उनको समर्थनमा नेता, सांसद, बुद्धिजिवी र वकिलहरुले पनि मुख फोरेका छन् । देशभर दबाब कार्यक्रम गरेर अदालतलाई सन्दिपको पक्षमा फैसला गराउन बाध्य पारिने अभियान्ताहरु बताउँछन् । अदालतले सन्दिपको पक्षमा फैसला नगरी मुद्धा सारेको सार्यै गरेर अन्याय गरेको भन्दै मुलुकभर प्रदर्शन हुन थालेको हो ।