चन्द्रकान्त न्यौपाने
कपिलवस्तु । बाणगंगा नगरपालिकामा जारी ३ दिने कृषि मेला आज सकिँदै छ । नेपाल विउ तथा मल परियोजना (सिमिट) को आयोजनामा बुद्ध रंगशालामा बुधबारबाट सुरु भएको मेला आज सकिन लागको हो । मेलाको दोश्रोदिनसम्म धेरै कृषकको भीँड लागेको आयोजक सिमिटका बजार ब्यवस्थापक डाक्टर नारायण प्रसाद खनालले बताएका छन् ।

उनका अनुसार मेलामा कृषि अत्याधुनिक प्रविधि, निशुल्क कृषि परामर्श, निशुल्क माटोको परीक्षण, बिभिन्न जातजातिका विरुवाहरुको प्रदर्शनी र धानका उन्नत जातहरुको बारेमा जानकारी दिने काम भइरहेको छ ।

मेलामा रहेका कृषिसम्वद्ध बिभिन्न ४४ स्टलमा घुमेर कृषकले लाभ लिइरहका उनले बताए । धानको सिजन भएकाले उन्नत जातका बिउविजनबारे बुझ्ने र बिउ किन्नेको भीँड रहेको सिमिटका बसन्त पराजुलीले बताए । आज उत्कृष्ट स्टल, सहयोगदाता सबैलाई सम्मान गर्ने कार्यक्रम पनि रहेको पराजुलीले बताए । मेलामा बाणगंगासंगै कपिलवस्तु र छिमेकी जिल्लाबाट पनि किसान आएर बुझ्ने गरेका छन् ।

नेपाल उद्योग बाणिज्य महासंघको कृषि उद्यम केन्द्र, बाणगंगा नगरपालिकाको सहकार्य र अमेरिकी सहयोग नियोग (युएसएआइडी) को सहयोगमा मेला भएको हो । सिमिटले गत बर्ष पनि मेला राखेको थियो ।