काठमाडौं । साहित्यकार उषा शेरचनको कथासङ्ग्रह ‘बेग्लै म’ सार्वजनिक भएको छ । पहिलो कथासङ्ग्रह ‘तेस्रो रङ्ग’ सार्वजनिक भएको १० वर्ष पुगेकै दिन जेठ १४ गते साँझ शेरचनले फेसबुक लाइभमार्फत् दोश्रो कथासङ्ग्रह “बेग्लै म” को लोकार्पण गरेकी हुन् ।

शेरचनले साहित्यप्रेमि, शुभचिन्तक, साहित्यकार तथा साहित्य क्षेत्रका झण्डै तीनसय श्रष्टाहरुसँगको फेसबुक लाइभमा ‘बेग्लै म’ का बारेमा जानकारी दिँदै लोकापर्ण गरेकी हुन् ।

साहित्यका शेरचनले कथा संग्रहमा रहेका सबै कथा कोरोना महामारीमा लेखेको र २०३५ सालमा ‘मोदी’ बेनी पत्रिकामा छापिएको कथा ‘लोप’ लाई समेत दस्तावेजका रुपमा कथा संग्रहमा समावेश गरेको जानकारी दिइन् ।

लोकार्पणका क्रममा साहित्यकार शेरचनले समाजमा विद्यमान रहेका उठाउनै पर्ने मुद्दाहरुलाई उठाएर कथामा समेटिएको बताइन् । उनले कथा लेखनमा धेरै समय र धेरै अध्ययन अनुसन्धान गर्नुपर्ने भएकाले यो कथासंग्रह आफ्नो अन्तिम कथा संग्रह हुनसक्ने समेत बताइन् ।