चन्द्रकान्त न्यौपाने, जितपुर । कपिलवस्तुको बाणगंगा नगरपालिकाले १५ औँ नगर सभामार्फत् सोमबार दिउँसो आर्थिक बर्ष २०८१ / ८२ को बजेट सार्वजनिक गर्यो । बजेट सार्वजनिकीकरणका प्रमुख अतिथि थिए संघीय भूमि ब्यवस्था, सहकारी तथा गरिबी निवारण मन्त्री बलराम अधिकारी ।

सो दिन नै संघीय सरकारको बजेटमाथि प्रतिनिधि सभामा अन्तिम छलफल थियो भने सम्भव भएसम्म आज नै बजेट पारित गर्ने कार्यक्रम थियो । संघयि सरकारको बजेटमाथिको बाँकी छलफल गरी बजेट पारित गर्ने संसदको कार्यसुचिपछि सरकारले मन्त्रीहरुलाई जिल्लाबाहिरका कार्यक्रममा जान निशेध गरिएको थियो ।

यस्तो अवस्थाका बाबजुत मन्त्री अधिकारी बाणगंगाको बजेट सभामा आएका हुन् । यो कुराको खुलासा अरु कसैले गरेका थिएनन् स्वयम मन्त्री अधिकारीले गरेका थिए । दिउसो १ बजे सुरु गरिएको बाणगंगाको बजेट सार्वजनिक कार्यक्रममा अधिकारी समयमै हाजिर भएका थिए । करिब २५ मिनेट भाषण गरेका मन्त्री अधिकारीले गृहनगरको माया लागेर सरकारलाई ढाँटेर आएको खुलाए ।

उनले भनेका थिए, ‘म आज निकै ब्यस्त छु । संसदमा संघीय सरकारको बजेट छलफल र पारित कार्यक्रम आजै छ । मन्त्रीलाई जिल्ला बाहिर जान निशेध गरिएको छ । म २/३ घण्टापछि आउँछु भनेर सुटुक्क यहाँ आएको छु । लगत्तै म जानु पर्ने हुन्छ । तै पनि केहि कुरा बताउँछु ।’
नभन्दै आफ्नो भाषण सकिएलगत्तै मन्त्री अधिकारी विदा भए । त्यहि २०/२५ मिनेटको समयमा मन्त्री अधिकारीले संघीय सरकारको अहिलेको स्थिति, काम कारबाही र गतिविधि, आफ्नो मन्त्रालयले गरेका काम, संघीय सरकारबाट बाणगंगाले पाएको बजेट, स्थानीय सरकरका प्राथमिकता, आगामी दिनमा संचालन हुन लागेका विकासका कार्यक्रम इत्यादिबारे बताएका थिए ।

उनले बाणगंगामा अहिलेसम्मकै धेरै बजेट आएको दावी गरे । बाहिर कपिलवस्तुले बजेट पाएन भनेर अनावश्यक हल्ला गरेको आफूले सुनेको भन्दै त्यो हल्ला मात्र भएको मन्त्री अधिकारीको जिकिर छ ।

अब कपिलवस्तुमा ठुला ठुला योजना संचालन हुन लागेको समेत उनले बताए । बाणगंगामा ५० शैय्याको ट्रमा सेन्टर संचालन गर्ने, नापी कार्यालय ल्याउने, सुकुम्बासी समस्या समाधानको लागि चाँडै काम थालनी गर्ने कुरा पनि उनले सुनाएका थिए ।