काठमाडौँ । बाढी र पहिरोका कारण देशका विभिन्न क्षेत्रमा सडक बन्द रहेका छन् । सडक विभाग र नेपाल प्रहरीका अनुसार लुम्बिनी प्रदेशका बिभिन्न राजमार्गहरु पनि अवरुद्ध भएका छन् ।

पूर्व पश्चिम राजमार्गको बुटवल–नारायणगढ सडकमा हिलो र लेदोले गाडी चल्न समस्या भएको छ । यस्तै पाल्पा गुल्मी सडक पुरै बन्द छ भने गोरुसिङे–सन्धीखर्क सडक एकतर्फी खुलेको छ ।

अर्घाखाँची गोरुसिंगे पनि अवरुद्ध भएकोमा एकतर्फीमात्र खुलेको छ । सिद्धार्थ राजमार्गको भैरहवा–पोखरा खण्डमा पनि ठाउँ–ठाउँमा पहिरो जाँदा गाडी रोकिने र चल्ने भइरहेको छ ।

भालुबाङ–प्यूठान सडक पनि बन्द हुने र खुल्ने भइरहेको छ । कालीगण्डकी करिडोरको गुल्मी र बाग्लुङ खण्ड बन्द नै छ ।
रोल्पामा सहीद मार्ग बन्द रहेको छ । कालिकोटका विभिन्न ठाउँमा पहिरो जाँदा कर्णाली राजमार्ग बन्द छ ।
यस्तै मुलुकका अन्य स्थानमा पनि बाढी र पहिरोले बाटाघाटा अवरुद्ध बनेका समाचार छ ।

मनाङमा पहिरो जाँदा बेसिशहर चामे सडक बन्द भएको छ । बेनीबाट मुस्ताङको जोमसोम जाने सडक पनि बन्द छ । यस्तै म्याग्दीको बेनी–दरबाङ सडक पनि अवरुद्ध छ ।

कालिगण्डकी करिडोरको नवलपरासीको गैँडाकोट–३ मा पहिरो गएर सडकमा गाडी चलेका छैनन । ठाउँ–ठाउँको पहिरोका कारण बझाङको जयपृथ्वी नगरपालिका–७ मा पहिरो जाँदा जयपृथ्वी राजमार्ग बन्द रहेको छ । देशका धेरैजसो सडकमा बाढी पहिरोको प्रभाव रहेकाले सडकको अवस्था बुझेर मात्र यात्रा गर्न प्रहरीले आग्रह गरेको छ ।

ललितपुरको बाग्मती गाउँपालिकामा पहिरो जाँदा कान्ति लोकपथ बन्द भएको छ । यस्तै पूर्वको भेँडेटार–रवि–राँके सडक पनि बन्द छ । सङ्खुुवासभाको मकालु गाउँपालिका र भोटखोलामा पहिरो जाँदा कोशी राजमार्ग बन्द भएको छ ।

खोटाङको हलेसी तुवाचुङमा पहिरोले मध्यपहाडी लोकमार्ग अवरुद्ध भएको छ । रसुवाको आमाछोदिङमोमा पहिरो जाँदा स्याफ्रुबेसी–थाम्बुचेत सडक अझै १० दिन नखुल्ने भएको छ ।