काठमाडौँ — काठमाडौं महानगरपालिकाले न्यूरोडको फुटपाथ विस्तारको काम निरन्तर गर्न पाउने भएको छ । उच्च अदालत पाटनले आइतबार आदेश जारी गर्दै काठमाडौं महानगरको मागबमोजिम फुटपाथ विस्तार गर्न बाटो खुलेको हो ।

अदालतका न्यायाधीद्वय धुव्रराज नन्द र प्रकाश खरेलको संयुक्त इजलासले काठमाडौं महानगरपालिकाको पक्षमा आदेश दिएको हो ।

महानगरले फुटपाथ विस्तारका लागि न्यूरोडको कालोपत्र काटेपछि सडक डिभिजन, काठमाडौंले आफ्नो क्षेत्राधिकारभित्र पर्ने भनेर अवरोध गरेको थियो । महानगरले न्यूरोडको सडकलाई पैदलयात्रीमैत्री बनाउन ठेक्कामार्फत निर्माण पक्ष छनोट गरेर जेठ ११ गतेदेखि काम थालेको थियो । जेठ १२ गते सडक डिभिजन, काठमाडौंले कालोपत्र गरेको थियो । त्यसपछि महानगरले जेठ २७ गते उच्च अदालत पाटनमा रिट दायर गरेको थियो ।