चन्द्रकान्त न्यौपाने, काठमाठौँ ।

डिभिजन वन कार्यालय कपिलवस्तुले बुद्धभूमि नगरपालिकामा डोजर चलाएर वस्तीबाट सुकुम्बासी जनतालाई विस्थापित गरेको विषयमा भूमि ब्यवस्था सहकारी तथा गरिबी निवारण मन्त्री बलराम अधिकारीले मुख खोलेका छन् ।

गृहजिल्ला बुद्धभूमिको वडा नं २ को वकडरिया गाउँमा डोजर प्रकरण भएको ५ दिनपछि मन्त्री अधिकारीले आफ्नो धारणा सार्वजनिक गरेका हुन् । आइतबार दिउँसो अपिटाइम्समार्फत् संक्षिप्त कुराकानीमा मन्त्री अधिकारीले वनले सुकम्बासी जनताको घरमा डोजर चलाएर डिभिजन वनले गलत गरेको बताउँदै यसको उपयुक्त उपाय खोज्ने बताए ।

अहिले आफू पार्लामेन्ट जान लागेको बताउँदै अहिले धेरै कुरा नभन्ने बताएका मन्त्री अधिकारीले संक्षिप्तमा आफू सुकुम्बासी जनताकै पक्षमा भएको बताए । उनले भने, ‘अहिलेसम्म बसेका जनतालाई यसरी उठाउने विषय ठिक भएन । उहिल्यैदेखि बस्दै आएका जनतामाथि डोजर चलाउनु राम्रो होइन, त्यसमा त्यहि किसमले अघि बढ्नु पर्दछ ।’

हतार भए पनि थप के भन्नु हुन्छ भन्ने अपिटाइम्सको प्रश्नले मन्त्री अधिकारी थप्छन् ‘म त के भन्छु भने जनताले दुख पाउनु हुन्न । बषौँदेखि बस्दै आएका जनतालाई उठाउनु गलत हो । बस्न दिनुपर्दछ । समस्या भए छलफल गरेर हल गर्नुपर्दछ । डिभिजन बनले गलतै गर्यो । त्यसरी उठाउनु हुँदैनथ्यो ।’

सुकुम्बासी जनताको घरमा डोजर चलाउने शैली पनि ठिक नभएको बताउँदै मन्त्री अधिकारीले पहिले बस्न दिने अनि अहिले उठाउने कहिँ हुन्छ त भन्दै प्रश्न गरे ? बुद्धभूमिको मात्र नभएर देशभरको सुकम्बासी समस्या समाधान गर्न मन्त्रालयले घनिभूत रुपमा काम गरेको भन्दै बाँकी कुरा साँझ भन्ने मन्त्री अधिकारीले वताए ।

उपाय खोजिन्छ र त्यहि किसमले अघि बढ्नु पर्दछ भनेको के हो त्यो भने मन्त्री अधिकारीले खुलाएनन् ।