काठमाडौँ । प्रधानमन्त्री केपी शर्मा ओ‌लीलाई विषय केन्द्रित भएर सांसदले उठाएका प्रश्नको जवाफ दिन सभामुख देवराज घिमिरेले निर्देश गरेका छन् ।

प्रतिनिधिसभाको सोमबारको बैठकमा प्रधानमन्त्रीसँग प्रश्नोत्तर कार्यक्रममा प्रधानमन्त्री ओलीले सांसदले सोधेको प्रश्न भन्दा पनि अन्य विषयमा बोल्ने थालेपछि प्रमुख प्रतिपक्षी दल माओवादी केन्द्रका सांसद वर्षमान पुनले आपत्ति जनाएका थिए ।

कांग्रेस सांसद धनराज गुरुङले प्रश्न सोधेकोमा प्रधानमन्त्री ओली भने प्रश्न भन्दा पनि अन्य विषयमा बोल्न लागेका थिए । डेडिकेडेट र ट्रंक लाइनको विषयमा शून्य समयमा माओवादी केन्द्रका सांसद लेखनाथ दाहालले बोलेको विषयको जवाफ दिन लागेका थिए । दाहालले प्रधानमन्त्री ओलीले डेडिकेडेट र ट्रंक लाइन विद्युत्को महसुल तिर्नुपर्ने विषयमा विश्वासको मत लिने क्रममा तथ्यभन्दा बाहिर गएर विषय राखेको भनेका थिए ।

ओलीले सांसद धनराज गुरुङले सोधेको प्रश्नभन्दा पनि सांसद दाहालले शून्य समयमा उठाएको विषयमा बोल्न लागेपछि सांसद पुनले सभामुख देवराज घिमिरेको ध्यानाकर्षण गराएका थिए । प्रधानमन्त्री कुन सन्दर्भमा बोल्दै हो ? भनी पुनले प्रश्न उठाएपछि सभामुख घिमिरेले निर्देशन दिँदै भने प्रधानमन्त्रीलाई विषय केन्द्रित भएर अगाडि बढ्नका लागि म निर्देश गर्दछु ।

सभामुखको निर्देशपछि प्रधानमन्त्री ओली सांसद गुरुङले सोधेको प्रश्नको जवाफ दिन लागेका थिए ।