चन्द्रकान्त न्यौपाने, जितपुर । वि.सं. २०८० सालको वि.वि.एस.दोस्रो वर्षको परीक्षामा नेपाल तृतीय भएका सयपत्री क्याम्पसका छात्र आशिष बेल्बासेसहित उत्कृष्ट विद्यार्थीहरुलाई भव्य कार्यक्रमबीच सम्मान गरिएको छ । कपिलवस्तुको बाणगंगास्थित क्याम्पसबाट परीक्षा दिएका बेलबासेले ८०.८ प्रतिशत अंक प्राप्त गरी नेपाल तृतीय भएका थिए । ७२.८ प्रतिशत हासिल गरेकी छात्रा एलिजा खत्री, ७०.६ प्रतिशत अंक ल्याउन सफल सृष्टि सुवेदी पनि सोही अवसरमै दोसल्ला, नगद र सम्मान पत्रले सम्मानित भएका थिए । यस्तै प्रथम श्रेणी हासिल गरेका नेहा पाण्डे (६७.२) र आशिष पाण्डे (६५) लाई पनि सम्मान गरिएको थियो ।

बेलबासेलाई भने क्याम्पसले नगद २० हजारले सम्मानित गरेको थियो । सोही अवसरमा उत्कृष्ट नतिजा दिलाउन मिहिनेत गर्ने प्राध्यापकहरुलाई पनि नगद, दोसल्ला, सम्मानपत्रले सम्मान गरिएको थियो । नेपाल प्रथम र द्धितीय हुने विद्यार्थी काठमाडौँ उपत्यकाका रहेकाले बेलबासेको अंक उपत्यका बाहिर प्रथम रहेको क्याम्पसको दावी छ ।

२०७६ त्रिभुवन विश्वविद्यालयबाट सम्बन्धन प्राप्त गरेको क्याम्पसले अहिले स्नातक तहमा वि.वि.एस.कार्यक्रम संचालन गरिरहेको छ । यो छोटो समयमै पटकपटक जिल्ला प्रथम हुनु र अहिले नेपाल तृतीय हुनुलाई शिक्षा क्षेत्रका ब्यक्तिले सयत्रीको छोटो समयको तीव्र उडान भएको भन्दै प्रसंसा गर्न थालेका छन् ।

कार्यक्रमको अवसरमा प्रमुख अतिथि रहेका कपिलवस्तुका प्रमुख जिल्ला अधिकारी विश्व प्रकाश अर्यालले सयपत्री क्याम्पसको खुलेर प्रसंसा गरे ।
सयपत्रीको सफलताले सिंगो कपिलवस्तुको गरिमा बढाएको शिक्षा प्रेमीसमेत रहेका अर्यालको भनाई छ । प्रमुख जिल्ला अधिकारीले कार्यक्रममा विद्यार्थीमा देखिएको खुसीले आफ्नो आँखा रसाएको समेत बताए ।

उनले भनेका थिए, ‘यो कार्यक्रम र विद्यार्थीको सफलताले बसिरहेको म खुसीले गदगद् थिएँ । झण्डै आँखाबाट खुसीका आँसु खसे । सफल विद्यार्थी, क्याम्पस परिवार, शिक्षक र अभिभावकलाई कस्तो भए होला ?’

अर्यालले सयत्रीको नतिजाले अन्य शैक्षिक संस्थालाई पनि प्रेरणा थपेको बताए । सयपत्रीको नतिजा उत्कृष्ट भए पनि समग्रमा कपिलवस्तु सामाजिक र शैक्षिक रुपमा पछि परेको उनले बताए । सबै मिलेर कपिलवस्तुको शिक्षा र सामाजिक स्थितिलाई माथि उठाउनु पर्ने उनको भनाई छ ।

क्याम्पस प्रमुख बासुदेव घिमिरे यस नतिजासंगै सयपत्री क्याम्पस अब बाणगंगाबासीको मात्र नभएर कपिलवस्तु जिल्लाकै भएको बताए । अबको यात्रा नेपाल प्रथम रहेको भन्दै त्यसै अनुसार मिहिनेत गर्न विद्यार्थी र शिक्षकलाई अनुरोध गरे ।

होराइजन स्कुल र सयत्री क्याम्पस यस क्षेत्रको ब्राण्ड बनेको उनले बताए । क्याम्पसले अब गुणस्तरीय शिक्षा प्रदानसंगै सिपमुलक शिक्षामा जोड दिने उनको भनाई छ । क्याम्पसबाट विद्यार्थी पासआउट हुँदा केहि न केहि सिप हासिल गरेर निस्कने गरी आफूहरुले तयारी गरेको जानकारी दिए ।

क्याम्पसका अध्यक्ष राजेन्द्र प्रसाद ध्वजुले यस नतिजाले आफू खुसी रहेको भन्दै ्नेपाल प्रथमको मिसनमा लाग्न सबैलाई आग्रह गरे । बेलबासे लगायतका विद्यार्थीको नतिजा मुलुकले गर्व खालको रहेको उनको दावी छ ।

कतिपय साथीले क्याम्पस सुरु गरौँ भन्दा नचल्ने भनेर डराएको स्मरण गर्दै अध्यक्ष ध्वजुले निरन्तरका अब्बल नतिजाले क्याम्पस कपिलवस्तु जिल्लाकै उत्कृष्ट र केन्द्र बन्दा सबैमा खुसी थपिएको बताए ।

क्याम्पसले ७७ सालदेखि बिभिन्न परीक्षामा पटकपटक कपिलवस्तु प्रथमको नतिजा हासिल गरिरहेको प्रबन्ध निर्देशक सुरेन्द्र घिमिरेको दावी छ । नतिजाबाट आफूहरु उत्साहित भएको उनले बताए ।

२ सय बढी विद्यार्थी र विद्यालयका संचालकको सहभागिता रहेको कार्यक्रमको संचालन प्राध्यापक मोहन अर्यालले गरेका थिए भने प्रबन्ध निर्देशक सुरेन्द्र घिमिरेले स्वागत मन्तव्य राखेका थिए । नेपालको देशप्रेम र संस्कृति झल्कने खालका विद्यार्थीको सांस्कृतिक प्रस्तुतिले कार्यक्रममा मनोरञ्जन थपेको थियो ।