जितपुर । रोटरी क्लव अफ सेन्ट्रल कपिलवस्तुको अध्यक्षको जिम्मेवारी रामु न्यौपाने (ज्ञानहरि) ले पाएका छन् । गत शनिबार साँझ बाणगंगामा भएको तेश्रो पद हस्तान्तरण कार्यक्रममार्फत् धर्मराज भट्टराईले न्यौपानलाई बर्ष २०२४/२५ को लागि पद हस्तान्तरण गरेका हुन् । पिस हिमालय रिसोर्टका संचालक रहेका न्यौपानेले पदभार ग्रहण गर्दै १२ महिना १२ कामको योजना ल्याएका छन् । रोटरीको मुल मर्ममा रहेर आफूले काम गर्ने न्यौपानेले बताए ।

लुम्बिनी प्रदेश सभा सदस्य बिष्णु पन्थीको प्रमुख आतिथ्यमा कार्यक्रम सम्पन्न भएको थियो । कार्यक्रममा बोल्दै पन्थीले रोटरीले लुम्बिनी प्रदेशमा सबैभन्दा धेरै सामाजिक र मानवीय कार्य गरिरहेको बताए । बिभिन्न स्थानमा डायलाइसिस सेवा पनि संचालन गरेर मृगौला रोगीहरुमाथि धेरै राम्रो काम गरेको पन्थीले बताए । सरकारको कर्मचारी तन्त्रमा रहेको अर्कमण्यता र राजनीतिले राम्रा कामहरु पनि छायाँमा परेको उनको भनाई छ ।

निकट भविष्यमा जसरी पनि बाणगंगामा मृगौला रोगीको लागि डायलाइसिस सेवा संचालन गर्ने उनले बताए । बाणगंगामा मृगौला रोगीको लागि डायलाइसिस सेवा संचालन गर्ने विषय पनि कर्मचारीको राजनीतिकै कारण रोकिएको उनले बताए । स्वास्थ्य मन्त्रालयमा पटकपटक धाउँदासमेत फाइल घुमाउने काम मात्र भएको उनले जानकारी गराए ।

कार्यक्रममा बाणगंगा नगरपालिकाका नगर प्रमुख चक्र अर्याल, रोटरीका बिशिस्ट ब्यक्तिहरु हिमाल गैरे, बावुराम भट्टराई, एजाज आलम लगायतले शुभकामना मन्तव्य राख्दै रोटरी कपिलवस्तुले गरेको काम प्रसंसनीय रहेको बताएका थिए ।
सोही अवसरमा बाणगंगाका एक जना गरिब र जेहेन्दार विद्यार्थीको एक बर्षको पढाइको जिम्मा लिन पनि रोटरी सफल भएको छ । भर्खरै निवर्तमान भएका धर्मराज भट्टराईले विद्यार्थीलाई कापी, कलम, झोला, स्कुल पोशाक दिँदै १० हजार रुपैयाँ पनि दिने घोषणा गरेका थिए ।

आफ्नो कार्यकालमा निकै राम्रा कार्यक्रम भएको भन्दै उनले सहयोग गर्ने सबैलाई धन्यबाद दिए । नेकपा एमालेका निवर्तमान अध्यक्ष डम्बर शर्मा छिमेकी क्लवका अध्यक्ष तथा प्रतिनिधि, स्थानीय संघसंस्थाहरूका अध्यक्ष तथा प्रतिनिधिहरूको उपस्थिति रहेको कार्यक्रमको संचालन सचिव बेदुराम पोख्रेलले संचालन गरेका थिए । कार्यक्रममा आधा दर्जन नयाँ सदस्य पनि रोटरीमा थपिएका छन् । यो कार्यसमितिले डाइलाइसिस सेवा संचालन गर्न पहिलो प्राथमिकता दिने बताइएको छ ।