बाणगंगा । नव प्रभात सामुदायिक वन उपभोक्ता समुहले ४ करोड १५ लाख बराबरको बजेट पेश गरेको छ । वनले आ।व २०८१।०८२ का लागि ४ करोड १५ लाख ४७ हजार ८ सय ९६ रुपैयाँको अनुमानित लोकप्रिय बजेट पेश गरेको हो । शनिबार वनको प्राङ्गणमा भएको १४ औँ वार्षिक साधारण सभामा उक्त बजेट प्रस्तुत गरिएको थियो ।

वनका अध्यक्ष डिल्लीराज रेग्मीले प्रस्तुत गरेको वनको अनुमानित आम्दानी तथा खर्च साधारण सभाले पास गरेको छ । समुहका सचिव सिता भुषालले कार्यक्रममा आर्थिक वर्ष २०८०।८१ प्रगति प्रतिवेदन प्रस्तुत गरेकी थिइन् भने कोषाध्यक्ष लक्ष्मी भुषालले आर्थिक प्रतिवेदन प्रस्तुत गरेकी थिइन् । लेखा समिति संयोजक राम प्रसाद पौडेलले लेखा समितिको प्रतिवेदन प्रस्तुत गरेका थिए ।
यस्तै अध्यक्ष, सचिव र कोषाध्यक्षको प्रतिवेदन बाधारहित तरिकाले एक ध्वनीबाट उपभोक्ताले पास गरेका छन् । उपभोक्ताले बादविबाद नगरिकनै प्रतिवेदनहरु पास गरेको हुनाले वनले उपभोक्ताको हितमा काम गरेको भन्दै अतिथिहरुले प्रसंसा गरे ।
वनले वन संरक्षण र सामाजिक विकासमा उल्लेख्य काम गरेको भन्दै अतिथिले प्रसंसा गरेका थिए ।

कार्यक्रमका प्रमुख अतिथी बाणगंगा नगरपालिकाका नगर प्रमुख चक्रपाणी अर्यालले वनलाई जोगाउदै सदुपयोग गर्न सके देशको विकास छिटै हुने बताए । नव प्रभात सामुदायिक वन उपभोक्ता समुहको १४ औ साधरण सभामा बोल्दै उनले वनको विकास हुँदा नगरको विकास हुने बताएका हुन् ।

सम्पुर्ण सामुदायिक वनहरुले नगरसंग संमन्वय गरेर काम गरेमा नगरवाट गर्नुपर्ने सम्पुर्ण सहयोग गर्ने उनले बताए । सामुदायिक वनहरुले धेरै प्रकारका प्रगति गरी वनवाट धेरै प्रतिफल प्राप्त गर्न सकिने मेयर अर्यालको भनाई छ ।

विशिष्ट अतिथि वडा नं ८ का वडा अध्यक्ष बाबुराम अर्यालले विकास निर्माणका काममा वडा संगको सहकार्यबारे बोलेका थिए । वैज्ञानिक वन व्यवस्थापन समिती अध्यक्ष रेनु सेनले मुलुकभरका सामुदायिक वनको हितको लागि संघले काम गरेको बताइन् । सरकार सामुदायिक वनप्रति अनुदार रहेकाले देशभरबाट खबरदारी गर्न जरुरी रहेको उनले बताएकी थिइन् । उनले पनि नव प्रभातका कामहरुबाट आफू प्रभावित भएको बताइन् ।

डिभिजन वन कार्यालय कपिलवस्तुका वरिष्ट वन अधिकृत शिव नन्दन शाहले वनको महत्व काठ दाउरामा मात्रै नभएर हरेक क्षेत्रमा रहेको बताउदै वनको दिगोपनामा ध्यान दिनुपर्ने बताए ।

कार्यक्रममा मधुवन सामुदायिक बनका अधयक्ष शान्तवीक्रम पौडेल, नव प्रभात वनका संस्थापक अध्यक्ष गुणादेवि पन्थि लगायतले बोलेका थिए ।

सोही अवसरमा वनका दर्जनौँ ज्येष्ठ नागरिकहरुलाई दोसल्ला र नगदसहित सम्मानित गरिएको थियो । यस्तै अरु ब्यक्ति पनि सम्मानित भएका थिए ।

वनका उपाध्यक्ष मित्रलाल कंडेलको स्वागत रहेको कार्यक्रमको सञ्चालन सचिव सिता भुषालले गरेकी थिइन् ।
झमझम पानी परेको अवस्थामा पनि उपभोक्ताहरुको बाक्लो सहभागिता थियो ।