जितपुर । कपिलवस्तुको बहुचर्चित धार्मिक वन मधुवनधाममा जीवन जगत्का बिबिध आयाम र बौद्ध धर्मका विषयमा अन्तरक्रिया कार्यक्रम सम्पन्न भएको छ । सारीपुत्र फाउण्डेसनको आयोजनामा भएको कार्यक्रममा देशविदेशका सयौँ ब्यक्तिको सहभागिता थियो ।

प्रमुख वक्ताको रुपमा थाइल्याण्डकी ९८ बर्षिय प्रोफेसर अचान सुजिन बोरीहर्नवानाकेल थिइन् भने उनीसंगै थाइल्याण्डबाट नेपाल आएका बिभिन्न भिक्षु, भिक्षुणी, विद्धान, विदुषी र यस क्षेत्रका बिभिन्न धर्ममा आस्था राख्ने ब्यक्तिको सहभागिता थियो ।

कार्यक्रममा थाइ प्रोफेसर सुजिनले समय सुत्त देसना स्थल मधुबन धाममा बुद्धलाई कसरी चिन्ने ? र बुद्ध उपदेशको बारेमा बताएकी थिइन् । सहभागिले बौद्ध धर्म, बुद्धत्व, जीवन जगत्का विभन्न शाश्वत् र जान्नै पर्ने विषयमा रुचीका साथ प्रश्नहरु सोधेका थिए । ती प्रश्नको जवाफ सुजिनले थाइ भाषामा दिएकी थिइन् भने त्यसको अनुवाद गरेर बुझाउने काम मधुवन धाम बौद्ध विहारका विहारका प्रमुख सुमंगलो भन्तेले गरेका थिए ।

कार्यक्रममा सहभागिले सोधेका विषयले सुचि निकै खुसी भएको भन्तेले सुनाए । नेपालका धेरै स्थानमा यस्ता कार्यक्रम भए पनि मधुवन धामको कार्यक्रम विशेष लाग्ने भन्तेको दावी छ । काठमाण्डौँको कोटेश्वरमा भर्खरै कार्यक्रम सम्पन्न गरेर आएको जानकारी दिँदै भन्तेले मधुवन धामको कार्यक्रमपछि अब लुम्बिनीमा पनि कार्यक्रम हुने बताए ।

औपचारिक सत्रमा विशिष्ट अतिथिको रुपमा लुम्बिनी प्रदेश सभा सदस्य विष्णु पन्थीको सहभागिता थियो । उनले ९८ बर्षिय सुजिनबाट ज्ञान प्राप्त गर्न पाउँदा खुसी लागेको बताए ।

सुजिनसहितका पाहुनालाई स्वागत गर्न पाउँदा आफू धेरै खुसी भएको सांसद पन्थीले बताए । मधुवन धामले अब देशविदेशका पर्यटक तानिरहेको भन्दै स्थानीय तह र प्रदेश सरकारले यस क्षेत्रको विकासमा जोड दिनुपर्ने बताए ।

सोही सन्दर्भमा धाममै निशुल्क शिविर पनि राखिएको थियो । देवदह मेडिकल कलेजको प्राविधिक सहयोगमा भएको शिविरमा विशेषज्ञ डाक्टरबाट मुटु, छाला, नाक, कान घाँटी, स्त्री तथा प्रसुति जाँच गरिएको थियो । स्वास्थ्य जाँचपछि आवश्यक परामर्श दिइएको थियो भने निशुल्क औषधी पनि वितरण गरिएको थियो । स्थानीयहरुले निशुल्क स्वास्थ्य जाँचले धेरै सहयोग पुगेको बताए । विशेष गरी वडा नम्बर ८ का स्थानीयको त्यहाँ बाक्लो सहभागिता थियो । मधुवन धाममा यसअघि पनि गत वैशाखमा यस्तै कार्यक्रम भएको थियो ।मधुवन धाम गौतम बुद्धले शाक्य तथा कोलिय कुमारहरु, भिक्षुहरु तथा देवताहरुलाई महासमय सुत्र प्रदान गरेको पवित्र ठाउँ हो । विश्वभरका बौद्धमार्गीमा यो ठाउँ अहिले निकै प्रचलित हुँदै गइरहेको छ ।

स्वास्थ्य शिविरमा स्वास्थ्य जाँच गराउँदै स्थानीय