जितपुर । कपिलवस्तु उद्योग बाणिज्य संघको आयोजनामा मंसिर १९ गते (पर्सी) देखि सुरु हुने १५ औँ कपिलवस्तु महोत्सव एवम् कृषि, पर्यटन तथा औद्योगिक प्रदर्शनी २०८१ को तयारी पुरा भएको छ । निकै चर्चा भइरहेको महोत्सवको तयारी ९० प्रतिशत सकिएको शनिबार पत्रकार सम्मेलनमार्फत् जानकारी दिइएको हो ।

संघका अध्यक्ष तथा ५०० सदस्यीय महोत्सव मूल समारोह समितिका संयोजक गणेश बहादुर क्षेत्रीले पर्यटन तथा नागरिक उड्यन मन्त्री बद्री पाण्डेले महोत्सवको उद्घाटन गर्ने बताए ।

आफूहरुले लगाउने महोत्सव लुम्बनी प्रदेशकै सर्वाधिक दर्शक ओइरने महोत्सवमध्येको महोत्सव भएकाले संघीय सरकारका मन्त्रीलाई यहाँको कला, संस्कृति, पर्यटनको सम्भावनाबारे जानकारी दिन पर्यटनमन्त्रीलाई प्रमुख अतिथि बनाइएको क्षेत्रीले बताए । महोत्सवमा स्थानीयक कला, संस्कृति, पर्यटन र औद्योगिक क्षेत्रका विशेष वस्तु र उत्पादनहरुको प्रदर्शनी हुने उनको भनाई छ । त्यसको लागि ५० स्टललाई निशुल्क रुपमा दिइएको पनि उनले जानकारी दिए ।

क्षत्रीले २ लाख दर्शकले यस महोत्सवको अवलोकन गर्ने र १० करोड बराबरको आर्थिक कारोबार हुने लक्ष्य लिइएको बताए । महोत्सव मिति नजिँकिदै गर्दा आफूहरुले भन्दा स्थानीयले यसको अपनत्व ग्रहण गरेकासमेत उनले बताए । क्षेत्रीले भने, ‘यसपटक यतिधेरै खुसी भएका छौँ कि हामीले भन्दा पनि यहाँका संघसंस्था, आमा समुह, युवाक्लवले महोत्सवको अपनत्व लिनुभएको छ । हरतरहको साथ र सहयोग हामीले यतिधेरै पाएका छौँ कि कुनै कमजोरी गर्ने छुट छैन ।’

क्षत्रीले साना कमीकमजोरीमा पनि आफूहरु सतर्क रहेको बताए । महोत्सवमा जुवातासलाई बन्देज लगाइएको, जुवा प्रकृतिका कुनै खेल खेल्न र खेलाउन नदिने गरी तयारी भएको जानकारी दिए ।
शान्ति सुरक्षाको दृष्टिकोणले पनि कुनै चिन्ता नगरी महोत्सवमा भित्रन दर्शकलाई क्षेत्रीको आग्रह छ । पत्रकार सम्मेलन आयोजनाको महत्वबारे स्पष्ट पार्दै संघका वरिष्ठ उपाध्यक्ष तथा निर्देशक हुमानाथ पौडेलले यसपटकको महोत्सव विशेष नै हुने बताए । पत्रकारहरुबाट सकारात्मक समाचार र सन्देश पस्कन पनि उनको आग्रह छ ।

महोत्सवको सचिवालयमा पत्रकारको लागि मिडिया डेस्क पनि बन्ने उनको भनाई छ । महोत्सवको प्रवेशद्धारदेखि नै दर्शक लोभिने गरी स्टल र स्टेजलाई आकर्षक बनाउन लागिएको उनले जानकारी दिए ।

पत्रकार सम्मेलनका प्रमुख अतिथि पत्रकार महासंघका जिल्ला सभापति किरणमान बज्राचार्यले महोत्सव सफल बनाउन सबै पत्रकारलाई आग्रह गरे । कपिलवस्तु महोत्सवले प्रदेशमै जिल्लालाई चिनाउने काम गरेको भन्दै यहाँको ब्यवस्थापन सदैव राम्रो हुने गरेको उनले बताए । संघका महासचिव नवदत्त घिमिरेको संचालनमा सम्पन्न कार्यक्रममा ५० बढी पत्रकारको सहभागिता थियो । उनीहरुले महोत्सवबारे उठिरहेका बिभिन्न प्रश्नहरु राखेका थिए ।

कार्यक्रममा संघका निवर्तमान अध्यक्ष डोलकराम घिमिरे, बाणिज्य उपाध्यक्ष नारायण पौडेल, सहकोषाध्यक्ष कृष्ण गैरे लगायतको सहभागिता थियो ।

यस्ता छन् विशेषता
२ लाख दर्शक, १० करोडको कारोबार
स्थानीय, कला, कृषि, पर्यटन र औद्योगिक प्रदर्शनी
१३ औँ डान्स आइडल
बिभिन्न जातजातिको झाँकी प्रदर्शनी र धर्म प्रवचन
महोत्सवको मूल गेट पशुपतिनाथको मन्दिरको आकारमा
पहिलोपटक बालुवामा साइक्लिङ र लुम्बिनी प्रदेशस्तरीय भलिबल
थारु लगायतका स्थानीय रैथाने खानाको ब्यवस्था
स्थानीय काठमा निर्मित मायाको चिनो
प्रदेशकै आकर्षक स्टेज र एलइडीको ब्यवस्था
स्थानीय ब्यापारीलाई १५देखि ३५ प्रतिशतसम्म स्टल छुट
विज्ञान र धार्मिक प्रर्दशनी र प्रवचन
राजेश हमालबाट कपडा बैङ्कको उद्घाटन