चन्द्रकान्त न्यौपाने, जितपुर । नेपाल पत्रकार महासंघ कपिलवस्तुमा दुई प्यानलबीच प्रतिस्पर्धा हुने भएको छ । केन्द्रबाट काँग्रेस र एमालेबीच तालमेल भएर कपिलवस्तुको कोटा एमाले समर्थित प्रेस चौतरीलाई परेपछि अर्को प्यानल बन्ने निश्चित भएको समाचार श्रोत बताउँछ ।

समाचार श्रोतअनुसार उक्त प्यानलमा केन्द्रको सहमति विपरित काँग्रेस निकट प्रेस युनियन र एमाले निकट प्रेस चौतारीका विद्रोही पत्रकार पनि समावेश हुने बताइएको छ । यदि केन्द्रको सहमति अनुसार अरु पार्टीका संगठन पनि सहमति भएको भए महासंघकी पूर्वउपाध्यक्ष पार्वती पाण्डे सर्वसम्मत अध्यक्ष हुने निश्चित थियो ।

तर पाण्डेमाथि माओवादी समर्थित प्रेस सेन्टर, राष्ट्रिय जनमोर्चा समर्थित प्रगतिशिल पत्रकार संघ, नेकपा एस समर्थित समाजबादी प्रेस संगठनका पत्रकार, चौतारी र युनियनकै पत्रकारले असहमति प्रकट गरेपछि पाण्डेको विपक्षमा प्यानल बन्ने भएको हो ।
पाण्डेको विपक्षमा बन्ने प्यानलको नेतृत्व (अध्यक्ष) महासंघका निवर्तमान अध्यक्ष डिलाराम भुसालले गर्ने महासंघका लुम्बिनी प्रदेश अध्यक्ष तथा पूर्व जिल्ला अध्यक्ष वसन्त गिरीले दावी गरे ।

भुसाल नेतृत्वको प्यानल श्रमजिवी पत्रकारहरुको प्यानल भएकाले युनियन, चौतारीमा आवद्ध पत्रकारले पनि सघाउने कुरा भएको उनको जनाउ छ । त्यसको साथमा अन्य मधेशबादी पत्रकारका संगठनको पनि साथ दिनेमा आफू विश्वस्त रहेको उनले अपिटाइम्सलाई बताए ।
अध्यक्षको विषय टुङ्गिएको र अरु कुन कुन पदमा ककसलाई मिलाएर लैजाने भन्ने सन्दर्भमा छलफल भइरहेको गिरी बताउँछन् ।
विद्रोही प्यानलको अध्यक्ष बन्न लागेका भुसालले पत्रकारहरुको चाहाना अनुसार आफू अघि बढेको बताए । आफू अध्यक्ष हुँदा हिजो सबैलाई मिलाएर लगेको र अब पनि त्योभन्दा शशक्त भूमिका निर्वाहा गरी महासंघको शीर थप उचो बनाउने भुसालको दावी छ । सहमतिमा जाऔँ भने पनि आफू तयार नै रहेको भुसाल बताउँछन् ।

भुसाल अघि सरेपछि कपिलवस्तुको चुनाव निकै कसिलो हुने अपेक्षा गर्न सकिन्छ । पाण्डे र भुसाल एक अर्काका पुरक हुन् । पार्टी र संगठन फरक भए पनि कतिपय ठाउँमा उनीहरु संगसंगै छन् । दुई जनाको यो भीडन्तले स्वयम् पत्रकार पनि अफ्ट्यारोमा पर्ने देखिन्छ ।

केन्द्रबाट पनि टिकट पाएको र अहिलेसम्म जिल्लाको नेतृत्वमा महिला पुग्न नसकेको हुनाले सबैले समर्थन गर्नेमा आफू ढुक्क रहेको उनले बताइन् । जुनजुन मोर्चा बनेपनि आफू बलियो कित्तामा रहेको उनको भनाई छ ।

काँग्रेस र एमालेका अग्रज पत्रकारले पनि पाण्डेको विकल्प नभएको बताउँदै विपक्षीको प्रयास केवल हल्ला भएको बताए । यदि त्यो कसरत भए उनैहरु पेण्डुलम हुने उनीहरुको भनाई छ ।

विद्रोही प्यानलको नेतृत्व गरेका पत्रकारका नेताहरुले भने अहिलेको चुनावमा आश्चर्यजनक नतिजा आउने दावी गरे । युनियन र चौतारीका नेताले संगठनविरुद्ध कुनै पत्रकार नलाग्ने दावी गरे । यदि त्यसो भए कारबाही हुने उनीहरुको चेतावनी छ ।

यता विद्रोही प्यानलका पत्रकार नेताहरुले धेरै पत्रकारले पार्वती पाण्डेलाई नरुचाएको बताए । काँग्रेस र एमालेका पत्रकारले चुनाव जिते महासंघमा झन् धेरै राजनीति गरी ध्वस्त बनाउने निश्चित भएको विद्रोही प्यानल खडा गरिरहेका पत्रकारका नेताहरु बताउँछन् ।

केन्द्रमा जस्तै जिल्लामा पनि विद्रोही प्यानल बन्ने भएपछि चौतारी र युनियनका नेताहरुको दौडधूप बाक्लिएको छ भने उनीहरुले आफ्ना संगठनका पत्रकारलाई सम्हाल्न भन्दै केन्द्रसम्म हारगुहार गर्न थालेको पनि बताइन्छ ।

तर कतिपयले सहमति हुने बताएका छन् । बाहिर चुनावको हल्ला गरेर पाण्डेलाई नै अध्यक्ष बनाउन भित्रभित्रै सहमतिको प्रयास भएको पनि समाचार श्रोत छ । आफूहरुको भाग मिलाउन नचाहिने हल्ला गरेको चौतारीका नेताहरु बताउँछन् । भोट हाल्ने पत्रकारहरुले दोधारे चरित्र नबोक्न नेताहरुलाई सुझाव दिए ।

विपक्षी प्यानलले पनि माथिसम्म दौडधूप जारी राखेका छन् । कपिलवस्तुमा ७५ पुराना र १३ नयाँ गरी ८८ जना पत्रकारले मताधिकार पाउँदैछन् । यसअघि जिल्लामा १९२ पत्रकार थिए । तर महासंघले शुद्धिकरण अभियान सुरु गरेपछि संख्या घटेर ८८ भएको हो ।

लुम्बिनी प्रदेशमा पनि विद्रोही मार्चाबाट प्यानल बनेको छ । यता पत्रकारहरुले भने श्रमजिवी र सक्रिय पत्रकारलाई मत खसाल्ने बताउँदै अब बलिको बोको नबन्ने अपिटाइम्सलाई बताए ।