जितपुर । हरेक बर्षजस्तै यस बर्ष पनि कपिलवस्तुको बाणगंगा नगरपालिकाका वडा नम्बर २ पिपरामा रहेको हिलबर्ट ईङ्गलीस बोर्डिङ्ग स्कुलले खेल सप्ताह सुरु गरेको छ । तामझामका साथ सोमबार सुरु भएको खेल सप्ताहको नगर प्रमुख चक्रपाणी अर्यालले बेलुननको झुप्पो उडाएर उद्घाटन गरेका थिए ।

प्रमुख अतिथि अर्याल लगायत मञ्चासिन अतिथि र विद्यार्थीको ध्यान पनि केहिछिन आकाशमा रहेको बेलुनमै केन्द्रित भएको थियो ।

बेलुनको तलको भागमा हिलवर्टको साप्ताहि खेलकुद सप्ताहको उद्घाटन समारोह लेखिएको थियो । त्यहि ब्यानर बोकेर बेलुनहरु आकाशमा पुगि हराएका थिए । यो दृश्यलाई धेरैले रोचक मानेका थिए । विद्यार्थीले हेर्दाहेदै बेलुनको झुप्पो आकाशमै हराएको थियो ।

‘एकताबद्ध देश खेलकुदको सन्देश’ भन्ने मुल नाराका साथ सुरु भएको खेल सप्ताहमा स्कुलमा रहेका करिब ११ सय विद्यार्थीहरुमध्ये अधिकांसले भाग लिएका छन् ।

एक सातासम्म चल्ने सप्ताहमा फुटबल, भलिबल, दौड, क्रिकेट लगायतका प्रतियोगिता संचालन हुने छन् ।सप्ताहमा सहभागि भएका विद्यार्थीले उद्घाटनमा उडाइएको बेलुनबाट धेरै आनन्द लिएका थिए । खेल सप्ताहमा सहभागि अतिथिहरुले स्कुलले गरेको ब्यवस्थापनको मुक्तकण्ठले प्रसंसा गरेका छन् ।

नगर प्रमुख चक्रपाणि अर्यालले खेल सप्ताहको उद्घाटन गर्दै स्कुलले गरेका गतिविधिको प्रसंसा गरेका थिए । नगर प्रमुख अर्यालले खेलकुद कार्यक्रमले विद्यार्थीलाई भविष्यको बाटोतर्फ अगाडि बढ्न टेवा पुग्ने बताए । बाणगंगा नगरपालिका शिक्षा क्षेत्रसँगै अतिरिक्त क्रियाकलापमा पनि अगाडि रहेको कुरा हिलवर्ट जस्ता स्कुलले देखाएको अर्यालले बताए ।

मेयर अर्यालले नगरपालिकाले शिक्षा क्षेत्रको गुणस्तरमा सुधार ल्याउन विभिन्न नीतिहरू लागू गर्दै आएको बताउँदै विद्यार्थीहरूको सर्वाङ्गीण विकासका लागि अतिरिक्त क्रियाकलापलाई विद्यालयले प्राथमिकतामा राख्नुपर्ने बताए ।

लुम्बिनी प्रदेश खेलकुद परिषद सदस्य तथा हिलबर्ट स्कुलका अध्यक्ष दिपक खनालले विद्यार्थीहरुलाई पठनपाठनमा मात्र सिमिति गर्न नहुने बताए । खेलकुदले बालबालिकाको रुचीको प्रष्फुटन गराउने र अनुशाषन पनि सिकाउने हुनाले आफ्नो स्कुलले सधैँ खेलकुद लगायतका गतिविधिमा जोड दिएको जानकारी दिए ।

कार्यक्रमका विद्यालयका प्रिन्सिपल शिवकुमार पोख्रेलले खेलकुद सप्ताहले विद्यार्थीहरूको आत्मविश्वास र टीमवर्कको भावना बढाउन महत्वपूर्ण योगदान गर्ने दावी गरे । स्कुलका प्रबन्ध निर्देशक बुद्धिराम पौडेलले खेलकुद लगायतका गतिविधिमा हिलवर्ट सदैव उच्च रहेको बताउँदै विद्यार्थीहरुमा भएको खेलको अन्तरनिहित प्रतिभालाई देखाउन हरेक बर्ष खेल सप्ताह गरिने बताए ।

विद्यालयका एकेडेमिक डाइरेक्टर तथा नेपाली विषय विभाग प्रमुख तेज प्रसाद आचार्यको संचालनमा भएको कार्यक्रममा खेल सप्ताहका संयोजक सन्तोष खनालले स्वागत मन्तव्य राखेका थिए ।

खेल सप्ताहमा विद्यार्थीको उत्साहजनक सहभागिता रहेको छ । सप्ताहमा सहभागि भएका विद्यार्थीले उद्घाटनमा उडाइएको बेलुनबाट धेरै आनन्द लिएका थिए ।