चन्द्रकान्त न्यौपाने

काठमाडौँ । मुलकभरका सहकारी संचालक कराडौँ रकम लिएर टाप कसिरहेको अवस्थामा कपिलवस्तुको वाणगंगा नगरपालिका भित्रका सहकारीमा कुनै समस्या नरहेको बताइएको छ ।

वाणगंगा सहकारी ब्यवस्थापक समुहले सोमबार एक विज्ञप्ती जारी गर्दै बचतकर्ता र शेयरधनीलाई कुनै चिन्तामा नरहन आग्रह गर्दै नियमित कारोबारमा संलग्न हुन अपिल गरेपछि त्यहाँका सहकारी समस्यामा छैनन् भन्ने बुझिन्छ ।

मुलुकका केहि सहकारी संचालकका कारण नगरभित्रका शेयरधनीमा चिन्ता थपिनु स्वभाविक भए पनि त्यस्तो चिन्ता नगर्न समुहका अध्यक्ष हरिलाल शर्माले आग्रह गरे । उनले ढुक्क भएर कारोबार गर्न बचतकर्तालाई अपि टाइम्समार्फत् सुझाएका छन् । उनी सिद्धार्थ बचत तथा क्रण सहकारी संस्थाका ब्यवस्थापक हुन् ।सहकारी संचालक र शेयरधनी पारस्परिक भएर अगाडि जाँदा भोलिका दिनमा कुनै समस्या नआउने ब्यवस्थापकहरुको विश्वास छ । वाणगंगामा अहिले बचत, कृषि तथा बहुउदेश्यीय सहकारी गरी ५९ वटा सहकारी छन् ।

वाणगंगामा शाइन बचत तथा क्रण सहकारी संस्थाले रकम अपचलन गरेको भन्ने समाचार आएपछि त्यहाँका बचतकर्तामा शंका उब्जिएको थियो । स्थानीय ब्यक्तिले सो सहकारीका संचालक र ब्यवस्थापक चोर नै भनेर सामाजिक संजालमा राखेपछि बचत कर्तामा थप शंका उब्जिएको थियो ।

शाइन सहकारी बाहिरबाट आई वाणगंगामा शाखा संचालन गरेको सहकारी हो । यस्तै बाहिरबाट आई शाखा संचालन गरेका सहकारीमा सुप्रिम र मञ्जुश्री पनि रहेका छन् । बाहिरबाट आएर शाखा संचालन गरेका सहकारीका बचतकर्ता भने सजग हुनुपर्ने वाणगंगाका सहकारी संचालक बताउँछन् ।

यस्तै ढोरपाटन नगरपालिकाका नगर प्रमुख देव नेपाली आफ्नो इमेज बचत तथा क्रण सहकारी संस्थाको करोडौँ रकम लिएर फरार रहेपछि जनमानसमा थप चिन्ता थपिएको छ ।