काठमाडौँ । बजेटको विषयलाई लिएर चरम असन्तुष्टि जनाएर सरकार ढल्ने चेतावनी दिएका नेकपा (एकीकृत समाजवादी) का अध्यक्ष माधवकुमार नेपालले आफ्नो बोली फेरेका छन् ।

बजेट बनाउँदा केहि जिल्लामा सिमिति गरी अधिकांस जिल्लालाई बाइकट गरिएको भन्दै पार्टीभित्रै चरम असन्तुष्टी छ । ‘सरकारबाट बाहिरिन परे बाहिरिने तर अन्याय र विभेद सहन नहुने’ पार्टीका शीर्ष नेताले भनिरहेका छन् ।

त्यसैको दबाबमा परेर अध्यक्ष नेपालले पनि सदनमा असन्तुष्टि जाहेर गरेका थिए र सरकारलाई चेतावनी दिएका थिए ।

तर उनले अहिले बोली फेरि फेरेका छन् । सोमबार पार्टी केन्द्रीय कार्यालय आलोकनगरमा आयोजित एक कार्यक्रमलाई सम्बोधन गर्दै उनले जेजे भए पनि सत्ता गठबन्धानका शक्तिहरु मिल्नुको विकल्प नभएको बताएका हुन् ।

आफ्नो पार्टी अहिले सत्ता गठबन्धनमा सहभागी भएको र गठबन्धनका घटकहरुका बीचका धाराहरुमा केही मतान्तर हुनु स्वभाविक रहेको भए पनि मिलेर अघि बढे मात्र मुलुक समृद्ध हुने बताए ।

उनले भने ‘अहिले हामी गठबन्धनमा सामेल छौँ। गठबन्धनका घटकहरूकाबीचमा धाराहरूमा केही केही मतान्तर पनि हुनसक्ला। तर म यसो हेर्दैछु, एउटा सत्ताधारी गठबन्धन छ, अर्को सत्ता बाहिरको गठबन्धन छ,’ नेपालले भने, ‘सत्ता बाहिरको गठबन्धनमा कस्ता कस्ता खालका शक्तिहरु छन्, संविधानमाथि गम्भीर आघात पु¥याउने शक्तिहरु छन्, संघीयतामाथि विश्वास नगर्ने मात्रै होइन, समाप्त पार्न चाहने शक्तिहरु छन्।’

अहिले सत्ताधारी र विपक्षी गठबन्धन रहेको बताउँदै उनले सत्ता बाहिरको गठबन्धनमा संविधानमाथि गम्भीर आघात पु¥याउने शक्तिहरू र संघीयतामाथि विश्वास नगर्ने मात्र नभइ संघीयता नै समाप्त पार्ने शक्तिहरू रहेको जिकिर गरे।

उनले अहिलेको गठबन्धन लोकतान्त्रिक र प्रगतिशील गठबन्धन भएको दाबी गरे। उनले कमजोरीको आलोचना गर्न कमजोरीप्रति लतारिने स्वभाव आफूहरुको नरहेको बताए। उनले अहिलेका सत्ताधारी शक्तिहरु एकतावद्ध भएर अघि बढ्ने कुराको विकल्प नभएको बताए ।

समाजवादीले भनेजस्तो न बजेट पुर्नलेखन हुने अवस्था देखिन्छ न उनीहरुका माग नै पुरा गर्ने अवस्था छ । अर्थमन्त्रीले यही अवस्थामा बजेट पास गर्ने निश्चितजस्तै छ ।