वाणगंगा । कपिलवस्तुको वाणगंगा नगरपालिका वडा नम्बर २ स्थित हिलवर्ट इङ्लिस बोर्डिङ स्कुलले पहिलोपटक सुरु गरेको रोबोटिक्स तालिमको सरोकारवालाले प्रसंसा गरेका छन् । विद्यार्थीमा रहेको सृजनशीलता, उद्यमी सोच र अन्वेषणात्मक क्षमता विकास गर्न आयोजना गरिएको तालिमको उद्घाटन सत्रमा बोल्ने वक्ताहरुले तालिम जिल्लामा नौलो रहेको भन्दै प्रसंसा गरेका हुन् ।

कार्यक्रमका प्रमुख अतिथि सांसद बलराम अधिकारीले विश्व बजारमा प्रतिस्पर्धा गर्ने खालका विद्यार्थीहरू उत्पादन गर्न यसखाले तालिमले सहयोग गर्ने भन्दै विद्यालयको प्रसंसा गरे । उनले समाज रूपान्तरणमा विद्यार्थीको घोकन्ते शिक्षा भन्दा व्यवहारिक शिक्षा महत्वपूर्ण हुने बताउँदै सबैले यस्ता खालका काम गनुपर्ने बताए ।

उनले अब घोकन्ते विद्या भन्दा पनि व्यवहारिक पक्षको शिक्षा बलियो बनाउनु पर्ने बताए । विहीवारदेखि सुरु भएको तालिम ६ गतेसम्म संचालन हुनेछ ।

विशिष्ट अतिथि बाणगङ्गा नगरपालिका उप प्रमुख रिता कुमारी चौधरीले विद्यार्थीहरूको विदेश पलायनलाई रोक्न तिनै तहको सरकार, शिक्षक र अभिभावक गम्भीर हुनुपर्ने बताईन । उनले पनि विद्यालयले गरेको नौलो कामको प्रसंसा गर्दै विद्यालयले नगरको गौरव बढाएको बताएकी थिइन् ।

त्यस्तै शिक्षा विकास तथा समन्वय इकाई कार्यालय कपिलवस्तुका प्रमुख थानेश्वर घिमिरेले आजको आधुनिक वैज्ञानिक युगमा विभिन्न प्रविधिको महत्व रहेको बताए ।
कार्यक्रममा कपिलवस्तु प्याब्सनका अध्यक्ष सुन्दर पाण्डेले रोबोटिक्स तालिम आयोजना गरेर राम्रो गरेको बताउँदै आइएसओको कार्यमा विद्यालयलाई सफलताको शुभकामना दिए । उनले विज्ञान र प्रविधिको युग तर्फ सबै विद्यालयले ध्यान दिनुपर्ने बताए ।

सीप सिक्नका लागि ६५ जना विद्यार्थीहरू तालिममा सहभागि छन् । तालिममा सहभागि विद्यार्थी पनि उत्साहित छन् । आफूहरुको चाहाना पनि यस्तै सिप सिक्नमा रहेको भन्दै अधिकतम फाइदा लिने उनीहरु बताउँछन् । तालिममा नेपाल रोबोटिक्स एसोसियसनले समन्वय गरेको छ ।

सर्टिफिकेट नेपालका म्यानेजर सुदीप शर्माले आइएसओ सर्टिफाइट विद्यालय भैसकेपछि राष्ट्रिय र अन्र्र्तराष्ट्रिय प्रतिस्पर्धामा बिक्न सक्ने बताउँदै लोगो प्राप्त गरेको हिलवर्टले सर्टिफाइट हुने गरि काम गर्नुपर्ने बताए । त्यसको लागि विद्यालय परिवार, व्यवस्थापन समिति र समुदायले इमान्दार भएर काम गर्नुपर्ने शर्माको भनाई छ ।

तिन दिनसम्म चल्ने कार्यक्रममा रोबोटिक्स सम्बन्धी तालिममा विद्यार्थीहरूलाई प्रत्यक्ष सहभागि बनाई विभिन्न सीपहरू सिकाइने विद्यालयका अध्यक्ष दीपक खनालले बताए ।

विद्यालयले पहिलो चरणमा आइएसओ सर्टिफाइट लोगो प्रप्त गरेको छ । अव आइएसओ सर्टिफाइट हुनका लागि विद्यालयले कुल ४२ वटा सूचकहरूमा क्रियाकलापलाई अगाडि बढाएको खनालको भनाई छ । विद्यालयका प्रबन्ध निर्देशक बुद्धि पौडेलले तालिम आयोजनाले विद्यार्थी उत्साहित भएको बताए । आगामी दिनमा थप यस्ता तालिम र रचनात्मक कार्यक्रम गर्दै जाने प्रबन्धक पौडल बताउँछन् ।

नेपाली विभाग संयोजक तेज प्रसाद आचार्यको सञ्चालनमा भएको कार्यक्रममा विद्यार्थी, शिक्षक, अभिभावक, विभिन्न विद्यालय र संघ संस्थाका प्रतिनिधि लगायतको उपस्थिति रहेको थियो । कार्यक्रममा शिक्षक रविन्द्र पौडेलको स्वागत मन्तव्य राखेका थिए । कार्यक्रममा विद्यार्थीहरूले सांस्कृतिक कार्यक्रम पनि प्रस्तुत गरेका थिए । हिलवर्ट कपिलवस्तुको पहिलो क वर्गको विद्यालय हो ।