एजेन्सी । इजरायलका रक्षामन्त्री योभ ग्यालान्टले हमास लडाकुको अखडा गाजा स्ट्रिपलाई पूर्ण रूपमा कब्जा गर्ने बताएका छन् ।

उनले आफ्ना सेनालाई गाजा पूर्ण रूपमा कब्जा गर्न निर्देशन दिएका हुन् । त्यसो त गाजाको हवाई मार्ग, तट क्षेत्रहरू सबै इजरायलको नियन्त्रणमा छ । गाजा स्ट्रिपभित्र कस्ता खाद्यवस्तु जान दिने र नदिनेबारे इजरायलले नै निर्धारण गर्दै आएको छ ।

इजिप्टले पनि गाजा क्षेत्रमा कस्ता मानिसलाई पस्न दिने र नदिने निर्धारण गर्दै आएको छ । गत शनिबार मात्र गाजा क्षेत्रबाट पाँच हजार क्षेप्यास्त्र र रकेटहरू इजरायलमा आक्रमण गरिएपछि यतिबेला हमास र इजरायलका सेना हिंस्रक युद्धमा होमिएका छन् ।

हमासका सेनाहरूले तेल अभिभसँगै दक्षिणी इजरायलका ८ स्थानमा घुसेरै आक्रमण गरेका छन् । अझै पनि ती स्थानबाट हमासका सेनाहरू हटाउन सकिएको छैन । उनीहरूले सयौँ मानिसलाई अपहरण गरेर बन्दीसमेत बनाएका छन् ।

हमासका सेनाहरू इजरायलभित्र समुद्रको बाटो हुँदै, प्याराग्लाइडिङ गर्दै र सीमा क्षेत्रको तारबार भत्काउँदै इजरायल घुसेका हुन् । इजरायलका अनुसार हालसम्म हमासको आक्रमणमा इजरायलमा रहेका ७ सय मानिसले ज्यान गुमाइसकेका छन् ।

यस्तै, उता इजरायलका सेनाले हवाई आक्रमण गर्दा गाजा क्षेत्रमा ४ सयभन्दा बढी मानिसले ज्यान गुमाएका छन् भने २३ सयभन्दा बढी मानिस घाइते भएका छन् । गाजा क्षेत्रका भवनमा इजरायलको जवाफी कारबाहीले ठूलो क्षति पुर्‍याएको छ । सार्वजनिक भएका भिडियोहरूमा गाजा क्षेत्रका केही भवन गर्ल्याम्मै ढलेको देख्न सकिन्छ ।