कपिलवस्तु । वाणगंगा नगरपालिकाको प्रमुख समस्या हो ‘छाडा पशुचौपाय’ को व्यवस्थापन नहुनु । स्थानीय तहको निर्वाचनपछिको पहिलो कार्यकालको ५ बर्ष र दोश्रो निर्वाचनपछिको कार्यकालको २ बर्षसम्म पनि छाडा पशुचौपाय व्यवस्थापनमा नगरले ठोस कदम चाल्न नसक्दा चौतर्फी आलोचना भइरहेको छ ।

नगरबासीका किसान, मिडिया, सरोकारवाला र बिभिन्न पार्टीले बिभिन्न समयमा यस विषयमा नगरको गम्भिर ध्यानाकर्षण गराइरहेका छन् । त्यहि चौतर्फी दबाबपछि नगरपालिकाले बल्ल छाडा चौपाया व्यवस्थापनका लागी समिति गठन गरेको छ । अपिटाइम्सले वाणगंगालाई निरन्तर खबरदारी गरिरहेको छ । यो विषयमा पनि यसअघि खबरदारी गरेको थियो ।

बुधबार बसेको नगरकार्यपालिकाको वैठकले नगर प्रवक्ता विष्णु पौडेलको संयोजकत्वमा ९ सदस्य समिति गठन गरेको हो ।
जसको सदस्यहरूमा जनप्रतिनिधि बाट बाणगङ्गा वडा न ६ का वडा अध्यक्ष करुण टण्डन, वडा न ८ का वडा अध्यक्ष बाबुराम अर्याल र वडा न ९ का वडा अध्यक्ष कमल प्रसाद पौडेल रहेका छन् । कार्यपालिका सदस्यबाट पिताम्बर सुनार र पार्वती सुनार रहेका छन् । समितिमा कर्मचारीबाट प्रशासन शाखा प्रमुख केशब भट्टराई सदस्य सचिव रहेका छन् भने पशु विकास शाखा प्रमुख राजकुमार तिवारी, आर्थिक प्रशासन शाखा प्रमुख सदस्य रहने गरी समिति गठन गरिएको हो ।

समितिले छाडा चौपाया व्यवस्थापन काम गर्ने जनाईएको छ ।संयोजक पौडेलले यसै आर्थिक वर्ष भित्र त्यसको अल्पकालीन तथा दीर्घकालीन समाधान गरिने बताए ।

नगर कार्यपालिकाको बैठकले अरु केके निर्णय गर्यो ?

नगर कार्यपालिकाको बैठकले अरु बिभिन्न निर्णय पनि गरेको छ । बैठकले आर्थिक वर्ष २०८०र८१ को लागी वार्षिक कार्य योजना पारित गरेको छ । १८ वटा बुँदामा रहेको वार्षिक कार्य योजना कार्यपालिका बैठकले पारित गरेको हो ।

वैठकपछि नगर प्रमुख चक्रपाणी अर्यालले वार्षिक कार्ययोजना पारित भएसँगै नगरपालिकामा विकासका कामले तिव्रता पाउने बताए । कार्ययोजना अनुसार तोकेकै समयमा योजनाहरू सक्ने वडाध्यक्ष, कार्यपालिका सदस्शा र शाखा प्रमुखलाई निर्देशन दिएको उनले बताए ।
प्रमुख प्रशासकीय अधिकृत भक्तिराम मरासिनीले बाणगङ्गाको विकासमा सबै एकजुट भएर लाग्न सबैलाई आग्रह गरे ।

बैठकले समृद्धिका लागी बन परियोजनाको वार्षिक कार्यक्रम तथा बजेट स्वीकृत समेत गरेको छ । यसैबीच घरनक्सा अभिलेखी करणका लागी चैत्र मसान्तसम्म सुचारु राख्ने निर्णय भएको नगरपालिकाकी उप प्रमुख रिता कुमारी चौधरीले बताइन ।
यस्तै वैठकले तिन पाङग्रे अटो तथा इ– रिक्सा व्यवस्थापनका लागि पनि समिति गठन गरेको छ । वडा नम्ब्र ४ का वडा अध्यक्ष छवि रेश्मीको संयोजकत्वमा ७ सदस्य समिति गठन गरेको हो । जसको सदस्यमा जनप्रतिनिधिका तर्फबाट वडा न १ का वडा अध्यक्ष सन्जु सारू मगर, वडा न। ८ का वडा वडा सदस्य शारदा परियार रहेका छन् ।

यस्तै कर्मचारीको तर्फबाटराजस्व शाखा प्रमुख मदन घिमिरे सदस्य सचिव रहेका छन् भने ई रिक्सा समिति र ट्राफिक प्रहरीबाट एकजना रहेका छन् ।

वैठकले सर्पले डसेर एकै घरका दुई दिदीबहिनीले ज्यान गुमाएका परिवारलाई नगरको राहत दिने निर्णय पनि गरेको छ ।
वडा न ९ मा सर्पले डसेर एकै घरका दुई दिदीबहिनीले ज्यान गुमाएका परिवारलाई रु ३५ हजार प्रदान गर्ने निर्णय भएको प्रवक्ता पौडेलले जानकारी दिए ।