काठमाडौँ । कपिलवस्तुको बाणगङ्गामा सञ्चालित तिन पाङ्ग्रे अटो तथा इ– रिक्सावालले चर्को भाडा असुली गरेको व्यापक जनगुनासो आएको छ । यस्तो जनगुनासो गर्नेमा पालिकाका कर्मचारीदेखि यात्रुसम्म छन् । बाणगङ्गा नगरपालिकाले तिन पाङ्ग्रे अटो तथा इ– रिक्सा व्यवस्थापनका लागि समिति निर्माण गरेपछि यो विषयमा फेरि सतहमा आएको हो । उसो त यसअघि पनि पटकपटक यात्रु ठगिने गरेका कुरा बाहिर आएका थिए ।

अटो ब्यवस्थापनसम्बन्धि समिति समाचार शीर्षकमा सामाजिक संजालमा क्रिया प्रतिक्रिया गर्नेहरुले यो विषय उठाएका छन् । उनीहरुले उठाएका सबाललाई विश्वास मान्ने हो भने अटोचालकले यात्रुलाई लुट्नसम्म लुटेका देखिन्छ। नगरपालिकाकै जिम्मेवार कर्मचारीबाट यो विषय आउँदा धेरैले लुटिएको महसुस गरेको बताउँछन् ।
नगरपालिकाका शिक्षा शाखा प्रमुख खिम बहादुर जिसीले दर रेट तोकिनु अनिवार्य रहेको लेख्दै १ किलो मिटरमा ५० रुपैयाँ कसरी तिर्नु भनेर प्रश्न पनि गरे ।

नगरपालिकाकै पिपरा अस्पतालका डाक्टर गणेश क्षेत्रीले खिम बहादुर जिसीको कमेन्टमा सर्मथन जनाउँदै १०० मिटरको दूरीमा २५० तिरेको र त्यसपछि कहिल्यै अटो तथा इ– रिक्सा चढ्न मन नलाग्ने भनी लेखेका छन् । सोही कमेन्टमा जिसीले ४ सय मिटरको दूरीमा १०० रुपैयाँ तिर्न बाध्य भएको लेखेका छन् । यसैमाथि क्रिया प्रतिक्रिया छन् ।

त्यस्तै रमेश चन्द्र भुसालले अटो तथा इ– रिक्सा ईन्धनवाला नभई विद्युतवाला सञ्चालनका लागि पहल गर्नुपर्ने र चर्को भाडाको सिन्डीकेट अन्त्य गरि विद्युतीय सवारीको प्रतिस्पर्धा गराउनु उचित हुने लेखेका छन् ।

कतिपयले अटो तथा इ– रिक्सा चढेपछि रु १ सय ५० तिर्नपर्ने बाध्यता पार्ने बताएका छन् । यस्तै जितपुरका मोहन पाण्डेले अटो तथा इ– रिक्सावालाको लाइसेन्स तथा रुटपरमिट चेकजाँच गर्नु अति आवश्यक रहेको उल्लेख गरेका छन् ।

यस्तै लायन्स क्लब अफ कपिलवस्तुका पुर्व अध्यक्ष राम सुभागे थारूले पनि गजेहडा बाट चार नम्बरको लागि चढियो भने १०० रुपैयाँ लिने गरेको खुलाए ।
उनले चर्को भाडा तुरुन्तै नियन्त्रण गर्नु पर्ने बताए । उता विष्णु भुसालले वनगाई भलवाड चल्ने अटो तथा इ– रिक्सावालले पनि मनपरी भाडा असुलीले जनता ठगिएको उल्लेख गरेका छन् ।

वाणगंगामा अटो चालकका दुई समिति छन् । तीमध्ये एक समितिका प्रमुख गणेश पोख्रेलले यस्तो हुनै नसक्ने र १०० मिटरमै २ सय पचास लिएको प्रमाण भए उक्त अटो चालकलाई कारबाही गर्ने बताए । केहि चालकले बदमासी गरे पनि अधिकांसले भाडामा एकरुपता कायम गरेको पोख्रेलले बताए ।

यसका लागि हिजो मात्रै नगरपालिकाले वडा न ४ का वडा अध्यक्ष छवि रेश्मीको संयोजकत्वमा गठित ७ सदस्यीय तिन पाङ्ग्रे अटो तथा इ– रिक्सा व्यवस्थापन समितिले यस विषयमा गम्भिर ढंगले काम गर्नुपर्ने सरोकारवाला बताउँछन्