काठमाण्डौ । काभा पुरुष भलिबल च्यालेन्ज कपमा नेपाल साउदी अरेबियासँग पराजित भएको छ ।

आज शुक्रवार दिउँसो श्रीलङ्कामा भएको खेलमा साउदी अरेबियाले नेपाललाई ३–२ को सेटमा हरायो । साउदी अरेबियाले पहिलो सेट २५–२२, तेस्रो सेट २५–२३ र पाँचौँ सेट १६–१४ ले जित्यो । नेपालले दोस्रो सेट २५–२१ र चौथो सेट २७–२५ ले जित्यो ।

लिगको अन्तिम खेलमा नेपालले उज्वेकिस्तानसँग भोलि शनिवार खेल्नेछ । यसअघि भएका खेलमा नेपालले अफगानिस्तान र बङ्लादेशलाई हराएको थियो भने श्रीलङ्कासँग पराजित भएको थियो ।

छ वटा टोली सहभागी प्रतियोगितामा राउन्ड रोबिन लिगपछि अङ्क तालिकाका शीर्ष दुई टोलीले फाइनल तथा त्यसपछिका दुई टोलीले तेस्रो स्थानका लागि प्रतिस्पर्धा गर्नेछन् । फाइनल र तेस्रो स्थानको खेल पर्सि २८ गते हुनेछ ।