काठमाडौँ । कांग्रेस नेता तथा सांसद डा. शशांक कोइरालाले पार्टीभित्र रहेको इतिहास र विचारका कारण कांग्रेस अरु पार्टीभन्दा बलियो रहेको बताएका छन् । काठमाडौंमा आयोजित कार्यक्रममा उनले पछिल्लो समय कांग्रेसभित्र बीपीको विचार समाप्त हुने डर रहेको बताए ।
पार्टीमा आपसी एकता हुनुपर्ने पनि डा. कोइरालाको भनाइ थियो । बीपीको विचारमा उभिएर पार्टी अगाडि बढेर आपसी एकताका साथ बीपीको विचार अंगालेमा कांग्रेसलाई कुनै शक्तिले हराउन सक्दैन उनले भने ।

त्यस्तै, बीपी कोइरालाको पहिलो सरकारको पालामा नेपालमा विकासको ढोका खुलेको बताउँदै कोइरालाले देशमा भएको सम्भावनालाई उच्चतम प्रयोग गरी विकास र समृद्धिका लागि पार्टीका नेता कार्यकर्ता लाग्नुपर्नेमा जोड दिए ।

कार्यक्रममा कांग्रेसका नेता दिलबहादुर घर्तीले १२ बुँदे सम्झौताका आधारमा देशमा शान्ति र स्थिरता कायम भएको बताउँदै अहिलेको संविधान कांग्रेसको नेतृत्वमा जारी भएकाले कार्यान्वयनको जिम्मेवारी पनि कांग्रेसकै काँधमा रहेको बताए ।