काठमाडौँ । कपिलवस्तुको वाणगंगा नगरपालिका वडा नम्बर ४ स्थित वाणगंगा माध्यमिक विद्यालयको व्यवस्थापन समितिको अध्यक्ष प्रकृया सुरु हुन लागेको छ । करिब ८ बर्षपछि विद्यालयमा समिति बनाउन लागिएको हो ।

अध्यक्षमा अहिले दुई जनाको नाम चर्चामा छ । ती हुन् स्थानीय अभिभावक कृष्ण कुँवर र पूर्वशिक्षक मदन शाही ठकुरी । कुँवर र शाहीको समाचार मिडियामा आएपछि अध्यक्षको चर्चामा रहेका शाहीले आफू अध्यक्षको दौडमै नै नरहेको बताएका छन् ।
‘कुँवरको ‘इन्ट्रि’ ले वाणगंगा माविको अध्यक्ष बन्ने शाहीको सपना तुहियो’ भन्ने समाचार अपिटाइम्सले प्रकाशन गरेपछि पत्रकारलाई धम्क्याउँदै फोन गरेका उनले आफू कहिल्यै पनि पदको लोलुपमा नरहेको दावी गरे ।

उनले भने ‘म अध्यक्षको उम्मेदवार हुँ भन्ने प्रमाण के छ ? म अध्यक्षको दौडको सपनामा कहिले भएँ ? भए पनि वडा अध्यक्ष छवि रेश्मी छन् । म होइन । पत्रकारले जे मन लाग्यो त्यहि गर्ने ?’

दलीय प्रतिनिधित्वको आधारमा अहिले शाही र कुँवरको नाम चर्चामा छ । शाहीको चाहानामा एमाले उनलाई अध्यक्ष बनाउन प्रयास गरेको छ भने कुँवर माओवादीबाट छन् ।

यस आधारमा शाही नै अध्यक्षको दौडमा रहेको छर्लङ्ग हुन्छ तथापि शाहीले भने आफू अध्यक्षमा नरहेको बताउँदै जथाभावी बोलेका छन् । उनका शब्दमा कुनै मर्यादा र शिष्टता भेटिन्न । सुन्न लायक नहुने गरी बोलेका उनले जथाभावी गाली गरेका छन् । उनको फोन रेकर्ड अपिटाइम्ससंग सुरक्षित छ । उनले पत्रकारलाई जे पनि गर्न सक्ने भन्दै तुरुन्त समाचार हटाउन धम्की पनि दिए । श्रोतका अनुसार एमालेबाट शाही नै अध्यक्षको दौडमा छन् ।

शाहीको दावी एक ठाउँमा छ तर समाचार बाहिर आएपछि वैठकको वैधतामाथि भने प्रश्न उठेको छ । गणेश चौधरी अध्यक्ष नरहेको अवस्थामा केहि समय वडा नम्बर ४ का वडा अध्यक्ष छवि रेश्मी अध्यक्ष थिए । उनको सहभागिताविना बैठक बसेको भन्दै त्यो अवैध हुने कतिपय बताउँछन् । रेश्मीविना बसेको बैठकले गर्ने निर्णय मान्य नहुने एमालेका नेताहरुको भनाई छ ।