काठमाडौँ । कपिलवस्तुको शुद्धोधन गाउँपालिकाका उपाध्यक्ष होम प्रकाश चौधरी (कुर्मी) ले कार्यालयमै आफ्नो डन प्रवृत्ति देखाएका छन् ।

गाउँपालिकाका प्रमुख प्रशासकीय अधिकृत कृष्ण प्रसाद ज्ञवालीमाथि दिउँसै कुटपीट गरेर उनले डन प्रवृत्ति देखाएका हुन् ।
विहिबार दिउसो २ बजेको समयमा पत्रकारसंग अन्तरवार्ता दिँदै गरेको अवस्थामा एक्कासी आफ्नो कार्यकक्षमा प्रवेश गरेर कुटपीट थालेको ज्ञवालीले बताएका छन् ।

उपाध्यक्ष चौधरीले ज्ञवालीको कठालो समातेर कुटेको बताइएको छ । जथाभावि गालीगलौज गरी टेवलकुर्चीसमेत फुटाएका उनले ज्ञवालीको सिधै कठालो समातेर कुटपिटमा उत्रिएका बताइएको छ । सुरुमा उनले दुई थप्पड हानेका श्रोत बताउँछ ।
आफूमाथि यसरी कुटपीट भएपछि प्रशासकीय अधिकृत ज्ञवालीले काम गर्न नसक्ने भन्दै सुरक्षाकाको माग गरेका छन् ।

जिल्ला प्रशासन कार्यालयलाई पत्र लेख्दै उनले तुरुन्त पक्राउ गरी चौधरीमाथि आवश्यक कारबाहीको माग गरेका हुन् ।
आज नै गाउँपालिका अध्यक्ष कमलेशशरण चौधरीको अध्यक्षतामा वैठक बसी उपाध्यक्ष चौधरीमाथि कारबाही नहुँदासम्म गाउँपालिका र वडाहरुको काम कारबाही बन्द गर्ने निर्णय भएको छ । के कारणले प्रमुख प्रशासकीय अधिकृतमाथि चौधरी खनिए भन्ने कुरा बाहिर आएको छैन ।सम्पर्क गर्न खोज्दा उपाध्यक्षसंग भने सम्पर्क हुन सकेन । घटनापछि प्रहरीसमेत पुगेको थियो ।
शुद्धोधन यस्तै लफडा भइरहने कपिलवस्तुको नमुना गाउँपालिकामा पर्दछ ।