कपिलवस्तु । कपिलवस्तुको बुद्धभूमि नगरपालिकाले नगरका खेल मैदानमा प्याराफिट निर्माणको सुरुवात गरेको छ । वडा नम्बर १ स्थित नर्शरी खेल मैदानबाट प्याराफिट निर्माणको कार्य सुरु गरेको हो । यहि मैदानमा बनेको प्याराफिटबाट विहिबार नगर प्रमुख केशव कुमार श्रेष्ठ र दर्शकले ७ औँ मेयरकपको उद्घाटन खेल अवलोकन गरेका थिए । प्याराफिटको माथि स्टेज बनाउने ठाउँ छ भने भित्र खेलाडीले ड्रेसिङ गर्ने ठाउँ बनाइदैछ । जिल्लाका अरु स्थानीय तहले अझै यस्तो सुरुवात गर्न सकेका छैनन् । बुद्धभूमिले गरेको यस सुरुवातलाई त्यहाँका खेल प्रेमीले निकै राम्रो सुरुवात भएको बताए ।

त्यहि प्याराफिटबाट खेल अवलोकन गर्दा मेयर श्रेष्ठ र विद्यार्थीहरु दङ्ग देखिन्थे । मेयर श्रेष्ठले अब नगरका महत्वपूर्ण खेल मैदानमा विस्तारै प्याराफिट बनाउने जानकारी दिएका छन् । नर्शरी खेल मैदानबाट सानो सुरुवात मात्र गरेको उनको भनाई छ । उनले भने ‘यो सानो सुरुवात हो । धेरै गर्न बाँकी छ । नर्शरी मैदानमा थप प्याराफिट निर्माण गरिने छ ।’

केहि समयअघि बनेको खेल मैदानमा स्थानीयस्तरका खेल भइरहेका छन् । मेयर श्रेष्ठले नगरको कुनै एक खेल मैदानलाई राष्ट्रियस्तरको बनाउने र अरु मैदानलाई पनि स्तरउन्नति गर्ने दावी गरे ।

खेल आएका विद्यार्थी, दर्शक र स्थानीयले पनि प्याराफिटबाट खेल हेर्न पाउँदा खुसी लागेको बताए ।
पहिलो दिनको खेलमा वडा नम्बर ९ र ५ ले प्रतिस्पर्धा गरेका थिए ।