चन्द्रकान्त न्यौपाने

काठमाडौँ । नेकपा माओवादी उपमहासचिव तथा संगठन विभाग प्रमुख जनार्दन शर्माले पार्टीको स्थायी कमिटीको वैठकमा पार्टीको नाम बदल्नुपर्ने सम्मका कुरा राखेका छन् ।

चोरबाटोबाट पूरक प्रस्ताव राखेका उनले बिभिन्न प्रस्तावमा पार्टीको नाम फेर्नुपर्नेसम्मका कुरा उल्लेख गरेका हुन् । उनले राखेको प्रस्तावमा पार्टीको नाम नेकपा समाजबादी राख्नुपर्ने उल्लेख छ । पार्टीको नाम समाजबादी रहेको खण्डमा अरु घटकलाई पनि समावेश गर्न सकिने शर्माको विशवास छ ।

यो प्रस्ताव उनले सोझै राखेका थिएनन् । प्रधानमन्त्री तथा माओवादी केन्द्र अध्यक्ष प्रचण्डले पार्टीको स्थायी समिति बैठकमा शनिबार विधान मस्यौदा २०८० को प्रस्ताव पेश गरेपछि एउटा कागज शर्माले यस्तो प्रस्ताव पठाएका खुलेको हो । एक्कासी यस्तो प्रस्ताव आएपछि खोजी नै गर्नु परेको थियो । पार्टी फेर्नेसम्मका प्रस्तावले अहिले पार्टीभित्र तरङ्ग उत्पन्न भएको छ ।
के थियो पुरक प्रस्तावमा ?

एकः पार्टीको नाम नेकपा समाजवादी राखौं । त्यसो गर्दा माओवादीबाट छुटेर गएका नेता कार्यकर्तालाई मिलाउन र अन्य पार्टीबाट मान्छे भित्र्याउन सजिलो हुन्छ ।

दुईः प्रदेश र जिल्लालाई केन्द्रबाट पूर्ण स्वायत्त राखौं । प्रदेशका मन्त्री छान्दा होस् या तल्लो तहमा उम्मेदवार छान्दा केन्द्रबाट हस्तक्षेप गर्दा कार्यकर्तामा ऊर्जा हराउँछ ।

तीनः सबै पदमा महाधिवेशनबाट प्रत्यक्ष निर्वाचित भएर आउनुपर्छ । मनोनयन र चयन बन्द गरौं ।

चारः जनवर्गीय संगठनहरुलाई पार्टीको वैचारिक बाटो बाहेकका विषयमा आफ्नै योजनामा चल्न दिऔं । उनीहरुले भ्रष्टाचारविरुद्ध बोल्दा होस् या कतिपय गलत प्रवृत्तिहरुविरुद्ध आवाज उठाउन पाउनुपर्छ । उनको प्रस्तावमाथि पार्टीभित्र एकमत देखिएको छैन ।