काठमाडौँ । कपिलवस्तु उद्योग बाणिज्य संघको आगामी ३ बर्षे कार्यकालको लागि अध्यक्ष पदमा उम्मेदवार मोहन न्यौपानेले घेराबन्दी तोडेर निस्कने बताएका छन् । संघको हितको लागि अध्यक्ष पदमा उठ्दै गर्दा चारैतिरबाट घेराबन्दीमा भएको भन्दै अन्त्यमा त्यसलाई तोडेर जित हासिल गर्ने न्यौपानेको भनाई छ ।

एसोसियट उपाध्यक्षमा बुद्धि पौडेल र बस्तुगत उपाध्यक्षमा रनेन्द्र सेनलाई अघि सारेका उनले शुक्रबार वरिष्ठ उपाध्यक्ष, महासचिव लगायत सबै प्यानल सार्वजनिक गर्ने बताए ।

विपक्षीको प्यानलले पुरानो पुस्तालाई मात्र प्रतिनिधित्व गर्ने हुनाले आफूले ४० बर्षभन्दा मुनिका ब्यक्तिको प्यानल बनाउन लागेको उनले अपिटाइम्ससंग बताए । काँग्रेस, माओवादी लगायतले संघको मातहतको क्षेत्रलाई समेट्न नसकेको भन्दै उनीहरुको प्यानल चार नम्बर र बैरियाका ब्यवसायीले भरिएको न्यौपानेको आरोप छ ।

गणेश क्षेत्री नेतृत्वको साझा भनिएको प्यानलमा काँग्रेस, माओवादी लगायतका ब्यक्तिहरु समेटिएका छन् भने न्यौपानेको प्यानल एमाले समर्थित छ । यता राष्ट्रिय स्वतन्त्र पार्टी समर्थित ब्यक्तिले लक्ष्मण कँडेल नेतृत्वमा प्यानल बनाएका छन् ।

अर्कोतर्फ रमेश चन्द्र भुसालले पनि अध्यक्ष पदमा उम्मेदवारी दिने बताइरहेका छन् । माघ २३ गते संघको १६ औँ साधारण सभा तथा आठौँ अधिवेशन हुँदैछ । अधिवेशनलाई लिएर अहिले चुनावी चटारो छ ।