चन्द्रकान्त न्यौपाने

काठमाडौँ । कपिलवस्तु उद्योग बाणिज्य संघले आगामी ३ बर्षे कार्यकालको लागि कार्यसमिति चुनावबाट नै पाउने भएको छ । सर्वसहमतिको प्रयास टरेपछि चुनाव हुने पक्का छ । बिभिन्न ३ समुह प्यानल बनाएर चुनावमा होमिएका छन् ।

काँग्रेस, माओवादी लगायतका ५ दल मिलित गठबन्धनमा निवर्तमान वडा अध्यक्ष गणेश बहादुर क्षेत्रीको प्यानल छ । युवा ब्यवसायी मोहन न्यौपानेले एमालेनिकट ब्यवसायीलाई समेटेर प्यानल बनाएका छन् भने राष्ट्रिय स्वतन्त्र पार्टी निकटहरुले लक्ष्मण कँडेललाई अघि सारेर स्वतन्त्र प्यानल बनाएका छन् । यी मध्ये अध्यक्ष पदमा कसले बाजी मार्छ त्यो भने यसै भन्न सकिने अवस्था छैन । चुनाव धेरै पेचिलो र रोचक बन्नेमा दुई मत छैन ।

स्वतन्त्र प्यानल भए पनि लक्ष्मण कँडेलले जित्ने सम्भावना कम छ भने न्यौपाने र क्षेत्रीमध्ये एक जनाले नै संघको आगामी नेतृत्व पाउने छन् ।
काँग्रेस, माओवादी, राष्ट्रिय जनमोर्चा, नेकपा एस लगायतका ५ दलको गठबन्धनले क्षेत्रीको जित सुनिश्चित जस्तो देखिन्छ । तथापि न्यौपानेले ५ दलको चेन ब्रेक नगर्लान् भन्न सकिन्न । प्यानल हेर्दा मोहन न्यौपाने कमजोर देखिन्नन् । न्यौपानेको प्यानल युवामैत्री, समावेशी र सन्तुलित देखिन्छ भने क्षेत्री प्यानलमा केहि कुरा मिल्न नसकेको भनेर आलोचना भइरहेको छ ।

तर यत्ति कारणले नतिजामा त्यति फरक नपार्ला । अहिले संघमा भएका २ हजार ८० मतदातामा कसको अंक गणित के छ त्यसबाट अलिकति जित हारको विश्लेषण गर्न सकिन्छ ।

संघमा आवद्ध २ हजार ८० सदस्यमध्ये सबैभन्दा धेरै एमाले, त्यसपछि काँग्रेस अनि तेश्रोमा माओवादी मत छ । अहिलेको रास्वपानिकट, राप्रपा, राष्ट्रिय जनमोर्चा लगायतमा निकट मानिने मत पनि छन् । २ हजार ८० मा चार सय ५० मतदाता नयाँ छन् ।
दावी अनुसार संघमा माओवादीका साढे तिन सय मत छ । तर यथार्थमा माओवादी मत भनेको २ सय हाराहारी नै हो । स्वतन्त्र, अरु साना ठुला दलको गरेर एक सय मत हुन सक्छ । २ हजार ८० मा ३ सय बाहेक १७८० मत भनेको काँग्रेस र एमालेको हो । यसमा काँग्रेसभन्दा एमालेको मत करिब २ सयले धेरै छ । श्रोत अनुसार एमालेको ११ सय मत रहेको छ भने काँग्रेसको ९ सय छ ।
यदि गठबन्धनको इमान्दार पूर्वक भोट आएको खण्डमा क्षेत्रीले १२ सय बढी मत ल्यान सक्ने देखिन्छ । यो भनेको जित हो । उनले यदि जित हासिल गरे भने १ सयदेखि १५० को मतान्तरमा हुन सक्छ । तर क्षेत्रीलाई यसरी ढुक्क हुने स्थति भने छैन । राष्ट्रिय जनमोर्चा, नेकपा एस लगायतका पार्टीबाट इमान्दारपूर्वक मत आए पनि बाणगंगामा माओवादी र काँग्रेसका मतदाताको भर भने छैन । उनीहरु मत क्रस गर्न माहिर मानिन्छन् । गत बर्षका स्थानीय, प्रदेश र संघीय चुनावका नतिजा यसका पुष्ट्याई हुन् । यहि घात हुँदा धेरै ठाउँमा माओवादी र काँग्रेस पछारिएका छन् ।

माओवादीका एक नेताले पार्टीकै निर्णय भएकाले यसपटक चुनावमा आफूहरुबाट घात नुहेन बताए । पार्टीका नेता हुमानाथ पौडेल वरिष्ठ उपाध्यक्ष र अरु पदमा पनि सम्मानजनक स्थिति हुँदा पार्टीको निर्देशन नै क्षेत्री प्यानललाई जिताउने रहेको ती नेताले बताए । नेकपा एस र राष्ट्रिय जनमोर्चाका नेताहरुले आफूहरुबाट बेइमानी नहुने बताउँदै बेइमानी भए काँग्रेस र माओवादीबाटै हुने बताउँछन् । गठबन्धनबाट धोका नभए क्षेत्री प्यानलका अधिकांस उम्मेदवारले जित हासिल गर्न सक्ने देखिन्छ ।

एमाले भने पार्टीको मत क्रस नहुनेमा ढुक्क छ । त्यसैले नतिजा आफ्नो पक्षमा पार्न ११ सय मत सुरक्षित गरेर माओवादीतर्फका सय र अन्य ५० मत खोस्ने रणनीति बनाएर लागिरहेको छ । यदि आफ्नो मत सुरक्षित गरेर सय देखि १५० मत खोस्न एमाले सफल भयो भने न्यौपानेको पक्षमा नतिजा नआउला भन्न सकिन्न ।

प्यानल नै राम्रो रहेकाले सबै क्षेत्रबाट न्यौपानेले राम्रो मत पाउने निवर्तमान अध्यक्ष उमानाथ पौडेलले बताए ।

न्यौपानेको ब्यवसायीमाझ न्यौपानेको निकै राम्रो सम्बन्ध रहेको पौडेलले बताए । यता माओवादी क्षेत्री प्यानलमा भए पनि टोप नारायण बेलबासेको भूमिका कस्तो हुन्छ भन्नेले पनि नतिजालाई फरक पार्न सक्छ ।

न्यौपानेका ब्यवसायिक पार्टनर बेलबासे भएकाले बेलबासेबाट न्यौपानेलाई सहयोग हुन सक्ने अनुमान गर्न सकिन्छ । तर माओवादीका एक नेता भन्छन् ‘टोप नारायणको भूमिकाले खासै असर पर्दैन । उनले न्यौपानेलाई साथ दिए पनि डराउनु पर्ने स्थिति छैन ।’

काँग्रेस र एमालेको यो साझो हिसाब अनुसार मत नखस्न सक्छ । समय, परिस्थिति, चेतना पनि फेरिएकोले अब पार्टी नभई ब्यक्ति हेरेर मत दिने तयारीमा कतिपय ब्यवसायी छन् । चार नम्बरका युवा ब्यवसायीद्धय विष्णु गैरे र विष्णु घिमिरेले आफूहरुले पार्टीका प्यानल नभई ब्यक्ति हेरेर मत दिने तयारीमा रहेको बताए ।

यदि ब्यवसायी सचेत भएर ब्यक्ति हेर्नतर्फ लागे भने दुवै प्यानलबाट मिश्रित परिणम आउन सक्ने अनुमान गर्न सकिन्छ । संघको अधिवेशन माघ २३ गते हुँदैछ । अधिवेशनलाई लिएर अहिले सबै चुनाव प्रचार प्रसारमा ब्यस्त छन् । सहमति नगरेर ब्यवसायी लडाउने काम रहेको हुँदा कतिपय ब्यवसायी मत नखसाल्ने पक्षमा देखिन्छन् ।