काठमाडौँ । प्रमुख प्रतिपक्ष दल नेकपा एमालेका अध्यक्ष केपी शर्मा ओलीले संसदको रेकर्डबाट ‘शब्द हटाइयोस्’ भन्ने माग नगर्न पार्टीका सांसदहरुलाई निर्देशन दिएका छन् ।

अध्यक्ष ओलीले संसदमा गल्ती बोल्नेहरुका शब्दले उसको परिचय दिने भएको भन्दै त्यस्तो जथाभाबी बोल्नेहरुको विरोधमा समय खेर नफाल्न आग्रह गरे ।

आइतबार पार्टी संसदीय दलको बैठक समापन गर्दै उनले संसदमा सरकारले गरेका गलत कामको सख्त आलोचना र बिरोध गर्न निर्देशन दिए ।

‘कहिले, कहिले हामीलाई कस्तो लाग्छ भने म जत्तिको मानिसलाई किन प्रशिक्षण चाहिन्छ ? मैले नबुझेर के छ र ? भन्ने लाग्नसक्छ । म आफैं संसद्मा यत्रो वर्षदेखि छु, यति कार्यकालदेखि छु भन्ने पनि लाग्न सक्छ, अध्यक्ष ओलीले भने, तर कतिपय प्राविधिक विषयहरु, कतिपय वैचारिक विषयहरुमा पनि स्पष्ट हुनु आवश्यक्ता पर्दछ । तसर्थ, अझ प्राविधिक विषयहरु, के कस्ता प्रस्ताव कसरी राख्ने हो? नियमापत्ति कसरी गर्नुपर्ने हो? कस्ता विषयमा गर्नुपर्ने हो ? यस्तो विषयमा प्रष्ट र समान बुझाइ हुनु आवश्यक हुन्छ ।

उनले बोली नै व्यक्तिको परिचय भएको बताए । गलत विषयको विरोध गर्ने हो । गलत बोल्ने व्यक्तिको होइन, जथाभावी बोलिरहने व्यक्तिको विरोध गरेर साध्य पनि हुदैन, उनले भने ।

उनले गलत बोल्ने व्यक्ति स्वयम्ले आफूले महसुस गरेर गलत बोलेछु, हटाइपाउँ भन्ने संस्कारको विकास हुनुपर्ने बताए ।