चन्द्रकान्त न्यौपाने
कपिलवस्तु । साइकलभरी प्लाष्टिकका कुर्सिको धरहरा बनाएर आइतबार एकजना ब्यक्ति बाणगंगामा डुलिरहेका थिए । दिउसो करिब २ बजेतिर बाणगंगा अटो ट्रेडर्स अघि आएका उक्त ब्यक्तिलाई कुर्सि किन्ने उद्धेश्य राखेर सोही स्थानमा बसेका एक जना ब्यवसायीले बोलाए ।

त्यसपछि कुर्सि किन्ने विषयमा कुराकानी सुरु भयो । ब्यवसायीले कुर्सिको मुल्य पनि सोधे । त्यसक्रममा ती ब्यक्तिले ४ वटा कुर्सिको मुल्य ३५ सय बताए । सुरुमा मुल्य सुन्दा अपत्यारिलो लाग्यो । त्यसपछि ब्यवसायीले ती ब्यापारीमाथि शंकाको सुविधा राखेर थप बुझ्न खोजे । कुर्सि ब्यापारीसंग बिल पनि मागियो । परिचय पत्र मागियो । परिचय पत्र माग्दा ती ब्यापारीसंग मवी अहमद नाम गरेको भारत सरकारले दिएको एउटा कार्ड पनि भेटियो । उनी उत्तर प्रदेशका रहेछन् ।

ब्यवसायीले जे शंका लागेर ब्यापारीसंग कुर्सि किन्ने निहुँ बनाएका थिए आखिर त्यहि भयो । नत उनले बिल देखाउन सके, नत ती सामान बैध हुने अरु कागज पत्र नै भेटिए । त्यसपछि ब्यवसायीले इलाका प्रहरी कार्यालयका प्रहरीलाई खबर गरे ।
लगत्तै प्रहरी पनि आयो र थप सोधपुछ गर्यो । सोधपुछ गर्ने क्रममा ती साइकल ब्यापारी अवैधजस्ता ठहरिए । आवश्यक सोधपुछपछि प्रहरी नीरिक्षक गोपालजंग रायमाझीको कमाण्डमा टोली ब्यापारीसंगै कुर्सि रहेको गोदाममा पुगे ।

त्यो ठाउँ थियो वडा नम्बर ४ ठाकुरापुरको एक घर । केहि पुलिस, ब्यवसायी मवीसंगै सटरसहितकाडेराभित्र पुगेर कोठामा छापा मार्न थाल्यो । भित्र हेर्दा कुर्सिका खातैखात भेटिए । गन्दा ६३३ वटा भए । मवी र उनको समुहले सटरसहितका २ कोठा भाडामा लिएर कारोबार सुरु गरेका रहेछन् । त्यहाँ कुर्सी बेच्‍नका लागि प्रयोग गरिएका ६ वटा साइकल पनि भेटिए ।

ती सबैको कुनै बिल पनि थिएन ब्यापारीसंग । अनि प्रहरीले साइकल र कुर्चि जफत गरी थप अनुसन्धानको लागि बाणगंगा नगरपालिकालाई बुझाएको छ । मवी प्रहरीको नियन्त्रणमा छन् ।

ईलाका प्रहरी कार्यालय पिपराका प्रमुख गोपालजङ्ग रायमाझीका अनुसार कुर्सी बेच्‍ने ब्यापारी मुख्य ब्यापारी भने होइनन् । मुख्य व्यापारी नभेटिए पनि ती कुर्सी कर छलि गरी ल्याइएका आसंका गरिएको छ ।
कुर्सीको बिल रुपन्देहीको भएको ब्यापारीले बताएका रायमाझीले बताए । बिल कुन कम्पनी र फर्मको हो त्यो भने पत्ता लागेको छैन । यसबारे थप अनुसन्धान भइरहेको प्रहरी नीरिक्षक रायमाझी बताउँछन् ।

। भर्खर मात्र बाणगंगामा कुर्सिको अवैध कारोबार सुरु गरेकाले धेरै क्षति हुन नपाएको स्थानीय ब्यवसायी बताउँछन् ।
यससंग रुपन्देहीसम्मकै ठुलो गिरोह संलग्न रहेको हुन सक्ने भएकाले जरोसम्म पुग्न ब्यवसायीले प्रहरीसंग माग गरेका छन् । प्रहरी नियन्त्रणमा रहेका मविले पनि यसको मुख्य कारोबारीबारे मुख खोल्न सकेका छैनन् ।

प्रहरीले यसबारे अनुसन्धान गरेर मुख्य नाइकेसंग पुगी अवैध् ठहरिए संलग्नलाई आवश्यक कारबाही गर्ने जनाएको छ । यी र यस्ता विषयमा जनप्रतिनिधि पनि चनाखो बन्नु पर्ने स्थानीय बताउँछन् । गाउँगाउँमा यस्ता प्रकृतिका धेरै अवैध् कारोबारी रहेको हुँदा स्थानीय सरकारले निगरानी राख्नु पर्ने उनीहरुको भनाई छ ।