कपिलवस्तु । बाणगंगा नगरपालिकाका बासिन्दा तथा रेडियो मायादेवीमा कार्यरत संचारकर्मी विष्णु खरेलले फरक तरिकाले जम्दिन मनाएका छन् ।

जन्मोत्सवको अवसरमा खरेलले कपिलवस्तु जिल्लाकै केन्द्र र महत्वपूर्ण ठाउँ चार नम्बर चोकमा नेपालको राष्ट्रिय झण्डा फहराएर नयाँ छनक देखाएका हुन् । संयोगले खरेलको जन्मदिनमा ७४ औँ राष्ट्रिय प्रजातन्त्र दिवस पनि परेको थियो । उनको यो कामलाई धेरैले रचनात्मक मानेका छन् ।

केक काट्नु, वृक्षरोपण गर्नु, आश्रममा भण्डारा लगाउनु सबै पुराना कार्य भइसकेको र प्रजातन्त्र दिवस पनि परेकाले झण्डाको सोँच बनेको उनले उल्लेख गरे । चारनम्बर चोक सबै हिसाबले सुन्दर भए तापनि राष्ट्रिय झण्डा नभएर खल्लो लागेपछि यस्तो सोच बनेको उनले बताए ।

अहिले सन्देशको लागि सानै झण्डा राखेपनि पछि अझै ठुलो झण्डा राख्ने सोँच रहेको उनले बताए । एक समारोहबीच भएको कार्यक्रममा रेडियोका स्टेसन म्यानेजर पिताम्बर घिमिरे, कर्मचारी, सहयोगी लगायत २५ जनाको सहभागिता थियो । कार्यक्रमको संचालन पत्रकार चेतन विष्टले गरेका थिए ।